أندية شيوخ العشاير

بقلم: حبيب العربنجي

هذا وكت هدايا بابا نويل، وكل واحد هو وحظه شي يطلع له من گونية بابا نويل ومروته، أكو تطلع له طوبة حمرة يحير شيسوي بيها وليش لازم حمرة خاصة إذا هو ضد الرفاق الماركسيين، بس كلشي حظ ونصيب، وأكو رياجيل تطلع لهم حفاظات ألوايز يحيرون وين يحطوها، وأكو نسوان يطلع إلهن معجون حلاقة أو جهاز تحديد شوارب، بس همين بنص هذا العالم أكو ناس تطلع لهم عقد تملك شقة بلندن، لو گرين كارد أميركا، لو منصب وزير وهو دچة ودبنگ بس مسوي خوش چطل وي كتلة عنده حصة هبرة چبيرة، وأكو ناس تطلع لهم مليارات ومليارات، بشرط دولار أخضر.

وبين هذا وذاك وذيچ وتلك واللواتي، يلعب الحظ لعبته في تفاهم مشبوه مع بابا نويل إللي أبد ما يكشف عن خطته التوزيعية ولا مسار رحلته، وللعلم أكو هواية ناس لزگوا بسطح البيت مدخنة بلكن ينزل فيها بابا نويل، وأكو هواية أمهات تركن متابعة المسلسلات ورسائل الواتساب وگمن يحوكن جواريب صوف بلكن يحط بيها بابا نويل هداياه، وبعض الخايبات سون جواريب بحجم بطانية أم النمر، وكل شي ماكو غير صراصر متونسة بالدفو، وبابا نويل يفوت ويضحك على الخيبات وبيده جرس الحظ، وهذول ما يحصلون غير الزربة توگع عليهم من السما، يقشمرون نفسهم عساس حلاوة (من السما)، بس اللون الخرائي فاضح للبخت، سماهم تمطر خرة وسما غير ناس تمطر مليارات.

وحتى يترتب البخت والحظ وتندار البوصلة لازم أكو شروط مثل شرط صحة صدور وختم مختار المنطقة ومختار العصر وتأييد من شيخ عشيرة يدخلك في صحبه الكرام البررة ومن حاملي راية ناموس العشيرة، وقدّم كل هذي الأوراق الثبوتية لديوان مكتب بابا نويل، وبعدها لازم تسوي عملية تيست لبختك مثل البث التجريبي حتى تتأكد أن موجة إشارتك متوافقة مع الهدايا المميزة في خزنة بابا نويل، ومن تتأكد گوم إشتغل براحتك وشوف السما شلون تمطر عليك البركات من كل زرف بالسما.

والدلائل گدامك تقرا وتسمع، مليارات جاي تنزل بجيوب أهل صحة صدور لأن عدهم أوراق عضوية وإنتساب مفتوح لنادي أحباب مختار العصر، ونادي مسعور العصر الكاكوي، ونادي الكر- محصور – بولي للقمار السياسي، ونادي العلاليق إللي شعاره ” البوگ من كل فجّ عميق” ونادي الجبور صاحب شعار ” بوگ حتى الگبور” ونادي السوامر وشعار ” بوك وأضحك عالقشامر” ونادي علاوي ما أدري وين البلاوي” داويني بالمليار داوي” ونادي الحكيم ” بوگ كل شي من الشعب الغشيم” ونادي الصدر ” بوگ من المهد للقبر” وأندية درجة أولى وثانية وثالثة بحسب تدريب شيخ العشيرة وقوة النادي في دوري الفساد.

هذولة الشيوخ يگعدون فصلية من يوگع أبو بريص من حايط بيت من غير عشيرة على حوش واحد من عشيرتهم، وما يگعدون فصلية من واحد من العشيرة يسرق أربعة مليارات دولار من جيب الدولة، لأن كل شيخ بيهم عنده حصة من السرقة وعنده صندوق دعم العشيرة يدخل بيه المقسوم إللي يدفعه السارق العشايري وهو الممنون لأن هو يمثل العشيرة في دوري الفساد وبتشجيع من مهوال العشيرة وجماهير نادي العشيرة.

وآني ما عندي عشيرة وأريد حظي يگعد وي بابا نويل بموسم الهدايا ولا عندي لزم عد مختار العصر، بس همين أريد چم مليار لتدعيم التچوة وتغيير الحال من الحافي لصاحب نعال ( بعدني في أجواء شعارات الأزلام النعلانية…. حيل شگد قديم)، هسة شلون ؟ أحد منكم يعرف الطريق وشلون يعيد ترتيب البوصلة ويدوزن الإشارة مع بابا نويل؟

كل سنة وما أعرف من أي سنة بديت، بس صارلها عمر بلا عافية أوگف ليلة مرور بابا نويل حتى أستلم هدية، وما أستلم غير حسرة ووجع بالرگبة، وأرجع خايب وأخدع نفسي وأگول يمكن تأخرت وما سنترت الوقوف وي لحظة المرور، لو يمكن الگونية إنباگت گبل من يوصل بابا نويل يمي، بس من أگعد وي نفسي أشوف السبب هو عدم وجود عشيرة تقربني تنطيني أوراق عضوية لواحد من الأندية الچبيرة إللي تعرف إشارات الهدايا وطريق مرور بابا نويل، وفي هذا السياق التأريخي راح نظل بحسرتنا ما دام إحنا ناس ما عدنا سند وي عشيرة تضبط إلنا بختنا، بينما أكو عشيرة مسودنة تلعب بالمليار لگو لأن واحد من أبنائها البررة الكرام وزّع عليهم خوش هدايا بمناسبة السنة الجديدة في تعاون إستراتيجي مع الشيخ بابا نويل قدّس الله سره وحفظ گونيته من كل شر .

ميري كريسمس للسوادن… وهارد لك للي بعده يظن أن الكرامة أغلى شي، عود أفتح لك سوپر ماركت متخصص ببيع الكرامة جملة ومفرد.