أنقلاب .. لو تشريب باميه !! … بقلم مؤيد حميد

أنقلاب .. لو تشريب باميه !! … بقلم مؤيد حميد
آخر تحديث:

البارحه فزيت من حلم .. خير اللهم أجعله خير, أنو المالكي , بعد ما خلصت كل الطاولات المستديره, وبوري المرجعيه, أنو تنازل عن مقعده.. بس بشرط أنو يكدر يرشح مقعده للانتخابات الجايه ..وحطو الجلبي أيدير حكومه أنتقاليه..وسمعت خير اللهم أجعله خير, طلقات وصعادات بالسما وأناشيد وطنيه وحماسيه.. وحنعيش بقوة السلاح.. وبغداد لا تتألمي.. والجوامع والحسينيات تكبر بأسم الله ..والكنائس تقرع أجراسها.. أني عبالي صار أنقلاب.. وكلت سواها علاوي , ما يرتاح ألا أيحصل على مقعد..خير اللهم أجعله خير..بس أتذكرت كلام حبيبنه وتاج راسنه أبوسراوي, أنو زمن الانقلابات ولى.. بس هاي شكو.. أول مره أشوف العراقيين يضحكون من كل جلاويهم.. هاي تهلهل وهاي توزع حلال المشاكل , وفد مره جبيره وشايله صينيه بيها خبز العباس وتوزع عالرايح وعالجاي.. وجوارينه يوزعون كلاصات سان كويك طبيعي أبو البرتقال..وأباوع على عمي قادر أبو الخضره, دمعاته محصوره بعينه ويرجف.. لان المخبر السري بزمن المالكي ,شفط أبنه ولزكوله طابع ودخلوه بالسجن..وأسمع جارنا أبو حقي أيكول لازم بالاخير ينتصر الحق عالباطل..وخير اللهم أجعله خير,سمعت ومحد كلي, فاتنة الشاشات الفضائيه الاموره, قناة الفرات..حاطه عبحليم, بحلم بيك أنا بحلم بيك , يريدون الصدك, أني فتر عندي القايش, لان كلها بجفه وعموري وعبحليم شلون تلاكو بجفه.. وخير اللهم أجعله خير, القناة الاكثر مشاهده في الصومال, تبث تقرير كتبه عبد الجبار الشبوط , مطلع خياس أبو سراوي من أول يوم أجه بيه للسلطه لحد المليارات اللي شفطها بصفقة الاسلحه الاوكرانيه والروسيه والجيكيه..وجان أيدير مافيا فروعها ببغداد وبيروت وبلندن , وخير اللهم أجعله خير, أيشي عمارات وأيشي فلل تخبل وملبوخه لبخ أجنبي مو مثل لبخنه .. وأيشي يختات وماطورات تمشي بالبحيرات والانهار,وسندات بالملايين وسيوله ببنوك عربيه وخليجيه , ليش أيشبعون , بلاليع وما تنترس , بس عدنه من مطره بلاليع الشعب أنترسن ..بس عدنه فد عاده مو حلوه.. من يوكع المطي أيجفصون أبمعدته..وخير اللهم أجعله خير, السجون السريه والعلنيه أنفتحت أبوابها وطلعت كل حرايرنه وأحرارنه, ولا بقى حرير أو حريره.. والتحمت مظاهرات الانبار وي النجف والموصل وي البصره وصلاح الدين وي العماره.. وتسمع هتافات وحده ما بيها  دغل ,  كلا كلا للطائفيه.. وعاش العراق.. ومن كايلك تلعب بينه..
هاي الاحلام تجيني من أكل بالليل تشريب باميه أيخبل وياه بصل يابس أيخلي المجاري كلها تنفتح, وطرشي مال الرحمانيه ماكو منه أثنين, حموضته تدمر.. ومن أشوف لقاء ويه صولاغ وهو لابس قاط أيملخ بس ما أيلوكله.. لان كل ما أذكر سجن الجادريه والبرينه.. روحي تطلع.. ومع أحلام أخرى أشلع بيها علاوي..
وما خفي كان أعظم !!

التعليقات

اترك رداً على غير معروف إلغاء الرد

لن يتم نشر عنوان بريدك الإلكتروني. الحقول الإلزامية مشار إليها بـ *