مصل بحروگ

مصل بحروگ
آخر تحديث:

 

  حبيب العربنجي

چنا  گاعدين بتنكة زبل چبيرة كلش، بيها كل ما تشتهي النفس، ظللينا هناك سنين حتى تعودت نفسنا  عالزبالة الموجودة بيها وريحتها وألوانها وحتى طعمها، وتعايشنا  وي الزبالة، بهاي الونسة والسلطنة إجتنا سيارة زبل ضخمة عبالك سفينة نوح .تابعة للبلدية إللي صار إلها عشرين سنة ما جاية، من وين طلعت ما تدري ، تجي وتدير فوگانا زبالة جديدة ما شايفيها ولا نعرف شلون نتعامل وياها، ريحتها تدوخ وتلزگ بكل مكان، وتدخل بأي فتحة بالجسم، صار إلنا سنين نعود نفسنا عالزبالة الموجود تالي أكو زبالة ما حاسبيلها حساب…كل شي محسبين إحنا حسابه…بس ما حسبناك تزبل علينا…حياك بابا حياك. تعال هسة شلون ندبر حالنا !!

والزبالة وي الزبالة تتفاعل وتتكاثر وتتوالد…تماماً مثل حالتنا الزبلية، وين ما نباوع زبالة قاطين، قاط من ذاك الصوب وقاط من ذاك الصوب اللاخ، زبالة عالصوبين مثل المدومن عالراسين بس بالتفلة ، أهل الخيم والإعتصامات زبلوا زبل…يا فحل زبلوا زبل ما صاير، حتى صارت زبالة  مليوصة وإنلاصت، وتفاعلت وي زبالة مال عشر سنوات ، وهذا التفاعل چانت نتيجته الدعوش والدعشنة، هذا في جماعة ذاك الصوب.

وجماعة الصوب اللاخ، زبلوا زبل، يا فحل زبلوا زبل  وهذولة كارهين كل شي، وهذا الكره جاب إلنا الحقد، والحقد جاب إلنا كل هذي البلاوي، هذولة هواية ما أگدر أعددهم بالأسم لأن ياهو تلزمه يطلع هو راس الشليلة، بس أگول بحسب المرسوم الجمهوري العربنچي من التسلسل رقم واحد  حتى التسلسل رقم ألف واحد …حتى بلوة الإعتصامات وأقليم الدليم والأخوة القذرين من آل نجيف وجماعة القرضاوي من المجرمين الهاشمي والعيساوي ابو الدفوف  وحتى كلب الدشبول أبو السدارة (وين صار؟ )  كلهم من ورا زبالة جماعة الصوب اللاخ لأن الزبالة بالزبالة تذكر.  وشلونك عيني كريّم چنك برغي مجيّم.

وجيب هاي الزبالة على ذيچ الزبالة تصير زبالة خرافية يحلم بيها مارد المصباح السحري…زبالة  إللي هسة إحنا واگعين بيها، ويگولون تحرير…يابة يا تحرير ! تعالوا بالأول نحرر العقل وبعدين نشوف دربنا ونصير وطنيين. كل هذا إللي صار ويصير سببه غياب العقل، وشوفوا كل أكلان الخرة مالتنا من خمسين سنة وأكثر، كلها بدت من طار العقل وصرنا شعب الله المخ طار، تريدون ترجعون تعيشون تعالوا نحترم العقل، صح هسة إللي براسنا مو عقل ولازم نستورد عقل من برة، بس خلونا نبدي.

العالم وين وإحنا وين…واحد من ذاك الصوب اللاخ كلش  منزل بصفحته الفيسبوكية معجزة العقل العراقي…إي وداعتكم هيچ كاتب..يابة شنو معجزة العقل العراقي….أستعد شوف شنو…يگولون عراقي صمم وإبتكر جهاز يسوي 1400 شيش كباب بساعة وحدة !! شلون إختراع  !! اكيد هسة ستيفن هوكينغ بايگ هوا وصار يركض بلكن يلحگ على القبر، لان القبور همين حظوظ وهذا خطية ما يگدر يمشي، بس من سمع الخبر بمعجزة فيزياوية صار يركض، هسة ياهو أهم المعجزة الفيزياوية لو المعجزة الربانية في جهاز شيش الكباب !! يعني تخيلوا لو ماكو هذا الجهاز، شيصير بالبشرية ؟؟ آني ما راح أكتب بس أنتو براحتكم تخيلوا شيصير… يمكن البصل راح ينقرض !

ومن ذاك الصوب همين كلش …واحد منزل صورة  وكاتب معجزة العقل العراقي…يابة أنت شنو !! عراقي حوّل جهاز لف السلگ بالدولمة إلى جهاز لف الراس والطربوش ، وهذا الجهاز يلف عشرين طربوش بالساعة !! من فلك لفكم  ، وتدرون الشيخ رافع والسعدي يحتاجون هيچ جهاز لان إيديناتهم مشغولة بحمل الگواني إللي بيها دولارات الشيخ تميم والقرضاوي وأردوغان !! والله لو آني بمكان السلگ إلا أطلع مظاهرة وأرفع القضية لهيومن رايتس ووتش، لإسترداد الحقوق المغتصبة والمطالبة بالتعويضات للإهانة المعنوية، عيييع بعد منو راح ياكل  الدولمة، هسة كل ما أشوف جدر الدولمة أتخيله مليان شعر من لحية رافع وعبدالملك!

يابة مولانا أبو يسر ترى صح آني ما أحب صوتك بس همين أمون عليك لان أنت إنگليزي وآني عراقي…ترى إحنا شبعانين نسوي الشط مرگ والزور خواشيگ…ودتشوف هاي الشطوط كلها إحنا شربناها ويبسناها من ورا خواشيگ الحكومة…يابة…إذا تريد التحرير وترجع نينوى لازم بالأول تحرر العقل العراقي من التفاهات والخرافات ، نريد حملة لتحرير العقل العراقي من الخرافات، وهاي الحملة تحتاج إلى قوانين وممارسات حكومية، حتى نبدي نتقبل إستيراد العقل، شبعنا إستيراد النعلان ساخت إيران وچسب دقلو والشلغم، يابة حتى الشلغم صار مستورد ، هسة نريد نستورد عقل، عيوني أنت أبو يسر (على مبدأ أبن سلول)، فرد حملة عقلانية، ترى صدگني أي حل ما يفيد وي الخرافات والتفاهات والزبالة، لأن هاي الخرافات هي أساس الجهل، والجهل أساس الفساد، هسة مو أنت تريد تحارب الفساد ؟؟ إي غير تضرب راس الفساد…وهذا الراس هو الخرافات عد ذاك الصوب وعد ذاك الصوب اللاخ.

عيوني…كافي شعارات.. نريد عقل….ومن يصير عدنا عقل راح أحتفل وأسوي عزيمة چبيرة، راح أجيب جهاز لف الكباب ، وراح نطوره بدال 1400 شيش نشد عليه تيربو نحلي بيه درزن خروف ويطلع شياشة جاهزة حتى وياهاه شماطة طوي ومصل بحروگ وتعالوا للحفلة وآني عليّ أشد راسكم بجهاز لف السلگ…العفو …بس هو شنو الفرق بينكم وبين السلگ !! ونوگف كلنا و نصيح…ياااااا معين…وشوفوا شلون الله راح يباوع بچهرتنا ويوفجنا…وراح يصير موفج قول وفعل مو بس شعارات ….صدگوني ترى الله الموفج.

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *