واحد بالمية…حلاوة سمسمية

واحد بالمية…حلاوة سمسمية
آخر تحديث:

 

  حبيب العربنجي

الجهة أو الدولة  إللي گدرت هي وجماعتها بالعراق  تهرّب ألف واحد من سجن أبو غريب من فتحة قطرها نص متر خلال أربع ساعات دون وصول الهليكوپترات لضربها وصعدوا  پيكپات فورويل مخصصة للصحراء چانت تنتظرهم ، وراحوا وهم يهوسون بأناشيد الموت والناس تسمعهم، هي نفسها إللي هسة تسمي نفسها داعش، ترى عوفكم من شغلة الخليفة والبطيخ، والشيشاني والقحطاني والغامدي والموزمبيقي وقريباً …مايكل النيويوركي ! هذي الأسماء كلها جامخانات لأغراض الصورة الصحفية .

وگلت وكتبت …روحوا وشوفوا منو هو المورد الرئيسي لسيارات فور ويل (الدفع الرباعي) للوزارات العراقية، ومن وين تجي ومن يا ميناء، وشوفوا منو الجهة إللي تسوي عمليات تخليص وشحن هاي السيارات، راح تشوفون خيوط هواية وراح تصدگون إحنا شگد غشمة  مع سبق الغباء والتقشمر. گلت هذا گبل ما تصير الشغلة عاوية مثل هسة، وكتبت ترى يابة راح تجيكم الدعشة وأنتم غافلون في مقالتي ” وأخذتهم الدعشة وهم غافلون” إللي نشرت قبل سقوط نينوى بيومين في موقع آخر وردت أوصل بيها رسالة بس الكل چانوا مقندلين بالهيوات والهمبلات (تگدرون تقرون المقالة عن طريق حجي گوگول بس : حبيب العربنجي ..فاخذتهم الدعشة وهم غافلون ) فقط لأغراض مصداقية الحچي ، مو عبالكم آني مثل الجماعة مصدر رفض الكشف عن أسمه !!!!

صرنا ساحة عرضات للطيارين الجدد…يا طيار يريد ياخذ فرة بالإف 16 خلي يتفضل…وأصلاً حتى يا طيارة  لأن الشغلة صايرة مال واحد يكشخ بيها، ليش فقط الطيارين…المهم تطير طيارة وتجي من ما أعرف وين، وتضرب پيكپ عليه رباعاية وترجع !!! بشرفكم شغلة تستاهل !!! وبعدين أكو شغلة كلش مدوختني…البيانات العراقية كل يوم إذا نجيب ورقة وقلم راح نشوف أكثر من مية داعشي مقتول…أي هذولة منو يدفنهم وين يدفنوهم؟…لأن إذا ماكو دفن هسة چانت الكوليرا ذابحتنا ذبح مو بس الداعش يذبحونا، يا أما الحكومة ناطية مقاولات دفن لجهة ما تريد نعرفها لأن هذولة الجيف راح يصيرون آبار نفط بعد چم مليون سنة، هيچ ذخر للمستقبل إحتمال سعر النفط يصير بعشرة ألاف دينار عراقي للبرميل (بعد مليون سنة ماكو دولار…السوق العالمية كلها بالدينار العراقي….سمعني عفطة من فضلك…طييييييييييييط ) ويا أما هذولة صدگ عدهم كرامات من الله يسويهم طيور ويطيرون للجنة ( سمعني عفطة على مقام طاطا يا طاطا ) ويا أما هذه البيانات كلها تصفيط حچي مال واحد گاعد ويتعلم يحسب أرقام…هسة سمعني دو ! إي عفية!

يمعودين…هيچ حساب عرب…إذا نجمع الأرقام من يوم 11 حزيران 2014 ولحد غرة هذا اليوم المبارك ونخليها كل لشة بصف لشة…بإعتبار اللشة طولها بالمعدل 170 سم، راح نشوف نگدر نسوي خط على طول خط الإستواء، ومن نسمع هاي البيانات نگول ها,,,إجا الخير…وصلنا للمريخ وراح نحرر نينوى، وهناك يطلع إلنا العمو الرفيق الأمريكي ويگول بعد ما يردد القسم ” امة عربية عاوية…..” ويگول ولكم أنتو صدگ چذب تحچون ؟؟ عيوني كل هذا الضرب والغارات وإيران وخداداد ومهرباد وسندباد وإسلام آباد ترى ما گدرت غير على واحد بالمية من مساحة العراق إللي محتلتها دولة الداعش  !!! لا بشرفك ؟؟ أدري كل يوم مو أقل من عشر غارات مال التحالف، وكل يوم مية مقتولين، وتگولون واحد بالمية !! هذا لعد إحنا نقاتل دولة بمساحة الإتحاد السوفياتي سابقاً وبعدد نفوس الصين والهند مجتمعة وقوة أميركا وبريطانيا وفرنسا من الناحية العسكرية .

يابة وداعتكم مسرحية كلش هابطة ولا عبالك سمير غانم وماجد ياسين…شلون ثنائي يخليك تتكهرب من السخافة وتترس جيوبك كهرباء وتجي للبيت وتديرها عالصينية مثل الدولمة وكلكم تستمتعون بالكهربا إللي يطلع مسؤول قهروباعي عوراقي ويگول ما عدنا قدرة على حماية أبراج القهروباع وعدنا كل يوم فقدان بالطاقة القهروباعية ! شكول شكول ورد الباگلا ! من نعلة على الدستور وتفلة على گصة پول بريمر. أدري هسة ما نريد نشوف مسرحية، ننطيكم فلوس التيكتات ونرشحكم لجائزة أحسن ممثلين وجائزة أحسن فلم أوسكار (نسوي واسطة ننطي جائزة أحسن فلم لأحسن مسرحية…تمشي ولا يهمك بفتوى نجيبها من أكبر راس ). لا وهناك يطلع الرفيق الحجي جون كيري (يصير أخو جبنة كيري وإبن عم بلاك بيري) ويگول تحرير…إي ركز على الكلمة تحرير نينوى بالصيف الجاي !! يعني هسة هاي الشغلات كلها بوخة ! بس محد سأل ليش مو قبل الصيف ؟؟ لأن هذا الموعد مرتبط بأسعار النفط والسعودية گالت ماكو مراجعة لأسعار النفط ولا معدلات الإنتاج قبل الصيف الجاي …ها يابة نصيح بات لو بعد ! ..عرفتوا شنو الموضوع لو تحتاجون وسائل إيضاح !!

بس أكو شغلة…من شهر حزيران 2014 ولغاية هسة ستة أشهر…وفقط الإنجاز واحد بالمية، ومن هسة للصيف ستة أشهر…يعني همين واحد بالمية…جيب ورقة وقلم وإحسب…چم ستة أشهر نحتاج حتى نوصل للمية بالمية ؟؟ لا تنسى جيب وخلي يمك حلاوة سمسمية وأنت تسوي الحساب…وتگدر تكرز حب شمسي قمر…إللي نسميه حب الثول… لا العفو مو أنت الأثول…الحب مال الثول… عود خابرني من تعرف الجواب …مع أمنياتنا بالنجاح والتفوق…والله الموفج.

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *