القاموس السياسي العراقي – الجزء الأول

بقلم:حبيب العربنجي

بعد ما شبعنا في العراق من الديمقراطية وطلع إلنا كرش وصار عدنا سكر وضغط وكوليسترول وجلطة بالدماغ سببت شلل وصعوبة الفهم والتخطيط والحساب، بعد كل هذا وذاك، وحتى اللي يجون ورانا يفتهمون شنو الموضوع والفلم مو مثلنا دبنگ ولحد الآن ما نعرف منو المخرج وشنو قصة الفلم، فلازم نعوف إلهم كتاب ودليل يستخدموه حتى يعرفون راسهم من رجليهم، هذا إذا إجوا طبيعيين مو راس بمكان وتك رجل.

وهذا الكتاب هو القاموس السياسي العراقي، وراح وزارة التجارة العراقية توزعه وي الحصة التموينية سنة 2040 بعد ما يجون ممثلين جداد هم ولاد وأحفاد ممثلين أجونا بعد 2003 ، وإليكم بعض صفحات من هذا الطتاب بس لعيونكم :

هاي شغلة عدس: عبارة راح تنگال في المفاوضات السياسية بين الأحزاب العراقية معناها إحنا رايدين وزارة الدفاع وأنت تنطينا مدرسة بالنعيرية.

أمورك جعفري: عبارة سياسية دبلوماسية تلخص تعقيدات الوضع والغموض في المشهد السياسي والهلوسة

وداعتك آني علاوي : بمعنى كلشي ما أعرف بالموضوع إللي د تلمح عليه وآني هب بياض. وهاي راح تكون من أكثر العبارات المستخدمة في الحوار السياسي بعد سنة 2040.

أهووووو أنت حيدر : عبارة راح تستخدمها الشخصيات السياسية بينها من تصير قائمة الوعود بمقياس الشط مرگ والزور خواشيگ

سالفتك مسعود : يعني بالمفاوضات السياسية عندك قابلية تتفل وتلحس التفلة مالتك وتگول باخوا خوشه.

دگة معصوم : يعني موضوعك راح تنام عليه طابوگة ومحد راح يناقشه خلال أربع سنوات

جسر الأئمة: يعني خسارتك بولة بالشط

مجمع الليث : يعني من تنلاص الأمور سويلك شغلة تشغل بيها الناس لا عالبال ولا عالخاطر، هيچ فكرة أوريجينال مثل يوگع إيركنديشن من الهوا بحضنك ما تعرف من وين لا وفوگاه يطلع منه هوا بارد طنين ونص وبدون كهرباء

إقبال : يعني سالفتك حلوة بس القبض من دبش

سلمان تخطيط: يعني فكرة خبيثة كلش

ولا چنك حبيبي : يعني كل يومين تهديد وتالي تضربنا بوري وتطلع أنت وياهم مو ويانا

سليم : كلشي أعوج ومو صحيح وكل الكلام الكذب وإستخدام المنصب للأغراض الشخصية

جلال : يعني أنت موقفك مثل الطوبة أيام منفوخة هوا زايد وأيام پنچر ومن گول لگول المهم أكو لعبة ومتفرجين

عمار : يعني أنت إنسان ممل وموقف حزبك مقزز وأنت مو صادق لأن تاخذ وما تنطينا وعندك قدرة تصلي بالناس صلوخ وتخطب خطبة الجمعة أن الصلوخ عيب

هوشيار: تبيع للناس گونية خيار بمليار دولار

طارق : يعني شبيك متشنج چنك ديك هراتي إنعلس بالمصارعة وصار مضحكة بين الديوچة والفروخ

المشهداني : موقفك ويانا كلش وصخ ومسوي نفسك مضحكة حتى تعبر موقفك علينا

صليوا : يعني جماعتك يبوگون بهدوء وينسحبون ومحد يدري بيهم

هاي ولا شغلة سپايكر: يعني تبوگ مليارات ولا چنها أكو شي وما يهمك لا كلام الناس ولا الصحافة

أشو صاير عادل : يعني مو كل يومين جايب إلنا قائمة جديدة وتعال نگعد ونراجع الأسماء

الفياض : يعني موضوع سخيف جداً عن فكرة أسخف وفوگاها تچلب بهذا الموضوع عبالك ماكو غيره

أبو إسراء : قذارة طائفية وبالوعة مليارات وبنك أفكار لبيع العراق خردة فروش لإيران بجلسة وحدة وأنت تلعب بخشمك

هاي سوالف أسامة: يعني سالفتك مثل قرود السيرك، تقفز هنا وهناك وتالي من تتعب راح يخلوك بالقفص وي الأسد وأنت وحظك… بس مضبط أمورك زين لان أكو قمچي تركي يحميك ويضرب الأسد

مجالس المحافظات : يعني گعدة چاي العصر تصير بيها توزيع مقاولات المحافظة على الگاعدين الحبايب ومن كل مقاولة كوميشون ربع الكلفة

والله أنت عبطان : يعني مضبط أمورك، تعرف وين تروح وشلون تضرب وتلغف.

وللقاموس بقية.