صور مؤلمة لعراقيين مهاجرين يبحثون عن وطن !
نسخة منه الى : ـ
مجلس النواب .. مجلس الوزراء .. في ميزان حسناتكم !
كم واحد يفكر بالهجرة ؟
السلام عليكم راح اسولفلكم شلون وصلت المانيا
يوم ٢٦/٧ رحت حجزت على الخطوط التركية لانها تنطي ون وي بس ذهاب المهم حجزت تذكرة على يوم ٢٩/٧ بقيمة $409 وصلت اسطنبول العصر استقبلوني شباب متفق وياهم بالفيس على اساس نطلع كروب واحد من تركيا والتجمع يكون يوم ٣٠/٧ المهم اهلا شباب وين بقيه الشباب كالو اليوم يوصلون قسم وباجر قسم والله اجه باجر والشباب محد وصرنه بوقتها بس ٨ نفرات من اصل ٤٥ نفر المهم يوم ٣١/٧ صرنه ٣٥ نفر يالله المهم اجتمعنا كل احنا بشقه بأقصراي اسطنبول واجه المهرب السوري على اساس يطلعنه بالبلم المهم اشو اجه كال انتو شعندكم رايحين بالبلم تعالو باليخت افضل الكم واحسن المهم فر عقول الشباب بالنسبه الي كتلهم ما اروح يخت لان غالي ٢٢ ورقه والبلم ١١ ورقه المهم اتفرق لكروب قسم راحت باليخت وقسم راحت الوحدها ورئيس لكروب احنا بخته رجع للعراق والله قررت انا اروح ازمير رحت ازمير واتفقت ويا مهرب يطلعني لليونان هالحجي يوم ٢/٨ الساعه ٧ الصبح گال اليوم اطلعك وبالفعل صارت الساعه ٦ العصر اجتمعنا كل احنا اللي نطلع من ضمنهم عوائل وشباب من سوريا والعراق المهم كل ٤ اشخاص يأجرون تكسي والتكسي يوصلنه على منطقه يحددها محمود ابو يزن منو هذا ما اعرفه بس انطونه رقمة وكالو خابرولة وانطو التليفون لبو التكسي وخل يحجي وياه المهم اجرنه التكسي وخابرنه الولد وانطينه التليفون لبو التكسي والله ابو التكسي اندل المكان وانطلق لمنطقه جبليه ودخلنا بشارع مظلم وجان ينتظرنا واحد سوري نزلنه وانطينه ابو التكسي فلوسه وراح واجه السوري كالو يالله دخلو دخلنا بغابه واشوف عوائل وشباب خير من الله المهم صارت الساعه ١١ اجه علينا لوري وصعدنه بي حرك اللوري الساعه ١١ وعشرة وجان العدد تقريبا ٨٣ نفر بحيث خنگة مو طبيعيه وما الك مكان تكعد بي الهم الساعه ٣ ونص الفجر وصلنه لمنطقه الانطلاق نزلنه من اللوري واستقبلنه تركي وكال امشو وراي مشينه وراه وانشوف البحر المهم كال حضرو روحكم ولبسو النجادات المهم انا كعدت لفيت تليفوني وفلوسي خفت لا سامح الله يغرك البلم المهم والاتراك بدو ينفخو البلمين قسمونه بالنص يعني طلعنه بلمين احنا جان العدد بالبلم اللي صعدت بي ٤٠ تقريبا والله وكملن البلمين وننتظر ان نببحر بيهم التركي كال بس خل يجيني اتصال يعني الضوء الاخضر حتى اطلعون المهم صارت الساعه ٦ الفجر كال يالله نزلو البلم نزلنه البلم وطلعنه انا كعدت بصف السايق اللي هو سوري واحد من عدنا يعني مو مهرب المهم كتله خويه انت سوق وانا راح اكلك اطلع يمنه يسرة لان بالليل اشوف اضويه اليونان صار الصبح اختفت الاضويه بس اكو جزء من الجبل طالع المهم حرك البلم وانا اكلة روح يمنه ويسرة لان كل شوي البلم يشمر والسايق مو ضابط السياقه عدل المهم وصلنه الساعه ٧ و٥ دقايق الحمدلله لجزيرة منتليني هالحجي يوم ٣/٨ الحمدلله بوقتها ماكو لا خفر السواحل التركي ولا اليوناني ولا الكمدوز الألماني هذول ما شفناهم كلهم بس جان طياره فوگنه تحوم بس هيج يعني اتصور جان يردون يتفرجون بس على فرحتنا من نوصل اليونان المهم وصلنه واستقبلونه نشطاء اوربيين من هولندا والمانيا وبرطانيا اخذونه لحديقه وانتظره لحد ما اجت باصات واخذته لمكان انسجل بي اسمائنا سجلت اسمي على اني سوري لانه السوري ما يطول يوم وينطونه الخارطيه المهم اخذونه للكم الكم طبعا وصخ المهم ثاني يوم الساعه ٥ العصر صاحو عبد العزيز محمد يالله اخذت الخارطيه وانتظرت الباص يجي ياخذني للباخرة اللي تگطع بيها تكت لأثينا سعر التكت ٤٦ يورو المهم حركت السفينه الساعه ٨ العصر من يوم ٤/٨ وصلت اثنيا الساعه ٦ الفجر من يوم ٥/٨ المهم نزلت من السفينه وشفتلي سوريين حتى نأجر تكسي ب ٢٠ يور لمحطة القطار وكل شخص يطيح عليه ٥ يور والله كالو اوكي يالله المهم اجرت التكسي للمحطه وصلت المحطه اخذت تكت على منطقه اسمها سولونيك الساعه عشرة ونص حرك القطار الساعه ٣ ونص العصر وصلت سولونيك بصف المحطه اكو كراج مال باصات اخذت تكت بواحد يور يوديني لمنطقه اسمها بولكاسترو المهم وصلت وهم حجزت على منطقها اسمها افزوني والله وصلت افزوني العصر الساعه ٦ طلعت الجي بي اس اريد اشوف السجه مالت القطار لان السايق مال الباص كال انت تريد تروح مقدونيا واشرلي مقدونيا بس ما اندليت المهم وجان بوقتها وياي عوائل سورين والله ضليت حاير طلعت الجي بي اس ردت اشوف وين السجه المهم وصلت للسجه لكيت سوريين كاعدين وينتظرون الجيش المقدوني يعبرهم والله نص ساعه وكالو يالله تعالو عبرو عبرت ودخلت بمزرعه عنب واكلت هذاك العنب الحلو المهم ساعه الا انا بمقدونيا بالمحطه مالت القطار انتظرت للساعه ١٢ ونص استلمت الخارطيه وانتظر على اساس القطار اللي يوصلني على الحدود الصربيه بس سألت كالو القطار خربان واكو قطار يجي الصبح المهم اتفقت ويا مجموعه سوريين ان نطلع بتكسي ب ١٠٠ يور وبالفعل طلعنه الساعه ٥ الفجر لحدود صربيا المهم الساعه ٧ الصبح نزلت من التكسي واجاني واحد كال صربيا صربيا ويأشر على الحدود المهم هو مخبل المهم طلعت الجي بي اس وهم نفس الشي اريد اشوف وين السجه مالت القطار المهم مشينه انا والولد للسجه والله مشينه ع السجه وجان انشوف الجيش الصربي كال نزلو من السجه نزلنه وجان اشوف ناس خير من الله ينتظرون الجيش الصربي يدخلهم والله شوي وجان يدخلوني ومشيت على السجه بأسرع ما يمكن ان اسرع ليش ما اعرف المهم من الفرحة يمكن لكيت اول ضيعه اللي هيه بيها جامع وبيها خزان مال ماي جبير نزلت للضيعه اجاني واحد راكب بايسكل كال تعال للجامع ارتاح وغسل وبعدين روح كتله مشكور اريد اكمل طريقي المهم كال اطلع كبل طلعت والله گبل والسجه على ايدي اليسره واكو ناس هم كاعد تمشي عليها المهم انا ساعتين تقريبا مشي وصلت للكم اللي اتسلم بي نفسك وينطونك ورقه الطرد وجان اجتمع بالولد اللي ركبو وياي بالتكسي كلولي احنا ما ننتظر ورقه الطرد رايحين المهم كتلهم انا ما اروح الا اخذ الورقه الطرد لان مره اكو شخص حجيت وياه يكول ما اخذت ورقه الطرد وصلت لبغراد ولزموني الشرطة ورجعوني مقدونيا ف كلت ليش اجازف خل انتظر ورقه الطرد وبالفعل انتظر لحد الساعه ٦ يالله وصلني الرقم اللي هو ٩٨٥ المهم دخلت وجان بوقتها يشمون رقم ٦٠٠ المهم صارت الساعه ونص بالليل وصل لرقم ٩٤٠ كالو عزلنا على باجر يمعودين يهل الرحم كالو ماكو على باجر المهم نمت بالحديقه وثلجت من البرد طلع اصبح وصارت الساعه ٨ وصل دوري وانطوني ورقه الطرد اخذتها وركبت مقابيل الكم اكو باصات يودونك ع بلغراد ب ٢٥ يور ركبت الباص وحرك الباص الساعه ١٢ لان يريد يقبط المهم جان يلزمنا ازدحام مو طبيعي بحيث اتأخرنا ساعتين بالازدحام المهم صارت الساعه ٧ يالله وصلنه دخلت بلغراد ودخلت لمركز المدينه وانا افتر وادور ع فندق المهم لكيت فندق ب ١٥ يور ويا الضريبه ١٦ يور ونص دخلت الفندق وسبحت ونمت وبوقتها جان عندي اعتاب ويا المخذه لان جان المخدة هيه جنطتي ونكسرت رگبتي من وراها المهم هالحجي يوم ٧/٨ المهم صبح الصبح وسألت موظفه بالفندق شلون اگدر اروح لمنطقه كنجازا گالت بالبصات والله رحت للكراج واريد احجي ع كنجازا گالت ماكو مقبط الا ع باجر وانا اشتري اليوم بلفلوس كتلها اليوم منا منا كالت ماكو المهم رحت لمحطه القطار اللي بصف الكراج هالحجي يوم ٨/٨ المهم رحت گلتلها اريد كنجازا كال كنجازا ماكو اكو سوبوتيكا ومن سوبوتيكا ٥ ك كنجازا المهم اخذت التكت تقريبا ب ٦ يور ورحت للفندق اريد اشحن تليفوني لان التذكرة مالتي الساعه ٢ الا المهم طلعت السايجك ونزلت خريطة هنغاريا يا شباب اكو برنامج اسمة سايجك نزلوه مهم جدا ونزلو خرائط الدول كلش ضروري المهم صارت الساعه ١١ نزلت لان الساعه ١٢ يخلص حجزي بالفندق المهم نزلت ورحت بالحديقه اللي بصف الكراج المهم كلت بالله خل اروح اسأل بالكت اكو كنجازا والله سألت كالت مقبط هم المهم كلتلها زين اكو سوبوتيكا كالت اي كلتلها اي يالله لان وانا بالفندق عندي صديق بالنمسا كلي عزيز القطار من تركض انت تغلبه يعني بطيء حيل المهم كلتلها ١٠ دقايق بس اكنسل التكت مال القطار واجي كالت اوكي بس استعجل المهم والله رحت وكنسلت الحجز ورجعتلها واخذت التكت تقريبا ١٢ يور ليش تقريبا لان صربيا ما تتعامل باليور تتعامل بالدينار ف رحت صرفت وانطيتها بالعمله مالتهم المهم الساعه ١٢ وعشره يحرك الباص المهم ركبت بالباص وبالفعل حرك بهذا الوقت والله وصلت الساعه ٣ تقريبا وحجزت على منطقه اسمها كنجازا اللي تبعد ٤٤ كيلو طلعتها بالسايجك وليس ٥ كيلو المهم. ب ٤١٠ دينار صربي ما اعرف اشكد يصير يور المهم الساعه ٤ ونص يحرك الباص وبالفعل حرك الباص وبوقتها الباص كله سوريين وصلنه لهاي المنطقه وشفت كروب سوري بس شباب استأذنت منهم وبلغتهم اشكل وياهم لان سمعت اكو سلابه ومن هالحجي ف خفت اجازف و اروح لوحدي والله صارت. الساع ٦ ونص والولد السوري التقريبا ما يعرف شي كال يالله خل نمشي كتله ليش هسه خل ننتظر شوي تظلم ونمشي كال هم يالله المهم سكتت ومشينه ومشينه ع السجه تقريبا ساعه وجان يجي واحد جندي صربي نذل حقير كلب كال لازم كلكم تروحون تجون وياي للمركز هاي شلون بلوه المهم شكله زباله هالشرطي اخذونه للمركز كالو انتو عابرين الحدود الصربيه ب ٣ كيلو وهذا مخالف لورقه الطرد عندكم ف احنا مضطرين انرجعكم لمقدونيا كتله شنو المهم اتبين خلال دقايق هذا تخويف منهم حتى يضغطون علينا ويحركون اعصابنه المهم شوي وجان يطلب من كل شخص ٥٠ يور المهم والله انطيت ٥٠ يور ومشينه تقريبا الساعه ١٠ باليل عبرنه صربيا بشوي والسوري كال خل ننتظر انا بوقتها نمت المهم صارت الساعه ٢ كعدوني كالو يالله خل نمشي مشينه ع السجه وهذا خطأ طبعا المهم اكو بنزين خانه ع ايدي اليسره هاي تابعه لهنغاريا وسامع انة اكو تكسيات بيها ف بلغت السوري كتله ما امشي ع السجه لان شوف الشرطة كل شوي انشوف ضواها كتله خل ندخل بالمزرعه مالت عرنوص وداخل المزرعه نمشي بحيث العرنوص اطول من عدنا المهم والله مشينه وجان خطة موفقه لان انا سامعها من واحد سوري طالع واصل المانيا من هذا الطريق علر المهم وصلنه لمكان ينتهي بي حقل العرنوص وجان اسحك رجل وصرخ كتله شعندك اهنا طلع عراقي ينتظر يطلع الفجر حتى يعبر للبنزين خانه كتله بشرفك تحجي صدك يعمي دعبر لان اذا طلع الفجر معرض للخطر لان حتى الاهالي والناس العادين بهنغاريا يبلغون اذا شافو واحد المهم هو وجماعته عبرو والله المهم انا بدلت ملابسي وذبيت الجنطه وكلتلهم منو يجي وياي المهم طلعو بس اثنين وانا ثالثهم المهم كتلهم راح نعبر بس بدون توقف ابد لحد ما نوصل لشارع العام والله بالفعل ركضنه وجان يجي ضوه السياره مالت الشرطة تقريبا علينا واذب نفسي ومشيت ازحوف لمكان بي شجر وانتظر السياره تروح المهم راحت السياره ونكتت ملابسي وعبرت الشارع وجان اشوف عامل نظافه كال تكسي كتله لا كلت لا يبلغ علي هذا طلع هو يشتغل ويا التكاسي المهم كاعد امشي اجه وراي سايق تكسي كال شنو تريد كتله اريد اروح بودبست كال الف يور انا بنفسي اطكة بوكسي لان سعر خيالي بس ما اكدر اسوي شي لان نذل ممكن يبلغ الشرطة ويجون ياخذوني المهم وصلت وياه لسعر ٦٠٠ يور لكل شخص ٢٠٠ يور المهم ركبنه السياره وصلنه بودبست ونزلنه وعندي عنوان فندق موجود بودبست هذا الفندق تكدر تنام بي بدون اوراق المهم والشرطة ما يجون لهذا المكان المهم انا بس وصلت اتفقت ويا واحد يطلعني للمانيا وهذا طبعا خطأ من عندي لان جان بأسطتاعي اروح بتكسي للنمسا ب ٣٥٠ يور ومناك اركب بقطار ٤٠ يور القطار يوصلني لميونخ المهم انا ما عرفت انه اكو هيج شي المهم والله كلي اطلعك ب ٦٠٠ كتله لا ٥٥٠ اكدر ادفع وافق والساعه ٩ ونص الصبح من يوم ٩/٨ حركت السياره لفينا النمسا نزلنه بفينا ننتظر يجي سايق يوصلنه المانيا وبالفعل اجه السايق الماني وركبنه وياه وصلني ع اول منطقه بالمانيا المهم سألت عن المحطه مالت القطار كالو تمشي ٢ كيو وتوصللها المهم وصلت المحطه وركبت لميونخ وصلت ميونخ وسلمت نفسي والحمد لله والشكر
السفرة كلفتني ويا الطيران واجور الفنادق والصرف كله ٣١ ورقه والله يوفقكم ويوفقني وياكم
شباب اكو فيديو خلال هاي الايام انشره واعلمكم شلون تكدرون تجون وبدون مهبرجي بس تعبر اليونان بحيث انت تعتمد على روحك وتمشي وخلال ٧ ايام بأذن الله توصل المانيا والاخطاء اللي صارت وياي اخليك ما ترتكبها بحيث انا ٢٠٠ يور هيج راحن المهم ان شاء الله انتظرو الفيديو بي هواي معلومات عن السفرة ان شاء الله خلال هاليومين انشره