شِنو يعني ؟

  علي الزيادي

على طريقة العربنجي حبيب علينا ان نطرح مالدينا من هموم ومعاناة وهي كثيرة ولايمكن حصرها بعد أن تحول البلد الى مرتع للموت ومستنقع للشواذ فكل شيء مباح ومستباح حتى باتت مفردة الحياة من الأحلام بعد أن سيطر اليأس نتيجة لأنتعاش الموت وبشكل غير مسبوق عالمياً . وكل شيء اصبح تقليدي ….

شنو يعني رئيس جمهورية يسافر في اجازة عيد مع بناته وازواجهن بينما المفخخات تضرب اطنابها وتحصد ارواحاً لم يسبق لبعضها ان سافر خارج بغداد بينما رئيس الجمهورية يتمتع بأجازته في لندن .

شنو يعني رئيس جمهورية لديه فرقة او يزيد حمايات ورواتب وبلاوي بينما البعض من الناس تنام وهي جائعة لم تستطع تأمين لقمة لوجبة واحدة !

شنو يعني رئيس جمهورية يزور الديوانية وهي المدينة الأكثر أمناً وأماناً بينما قافلة السيارات التي ترافقه لها أول وليس لها آخر .

شنو يعني رئيس جمهورية حامي الدستور بينما الحكومة ومن معها تتعمل ( بالقندرة ) مع الدستور .

شنو يعني اذا ماتحقق شي للمواطن بينما المسؤولين أصبحوا حيتان ! وشنو يعني اذا الشاب العراقي المتخرج من الجامعة يتم تكريمه بالحصول على ( ستوتة ) ليمارس دور حَمّال بينما من كان حَمّال اصبح يملك من الأموال مالاتحمله الجِمال . شنو يعني اذا مات الشباب وهم يواجهون الأرهاب ؟ وكل ما انتهى الأرهاب في مكان جاء لنا الساسة بأرهاب جديد !

شنو يعني انهيار المؤسسات الصحية فيشح العلاج لأن الوزراء لديهم التزامات تجاه أحزابهم وبعدين لازم يبوكون أموال الوزارة ! وشنو يعني ؟

وشنو يعني اذا انهار التعليم فالأحزاب افتتحت المدارس الأهلية والجامعات ويجب تدمير التربية والتعليم حتى يذهب الناس الى التعليم الخاص !

وشنو يعني اذا بقى الحرامي رئيس وزراء كلش عادي لأن النفط للحكومة والأحزاب . يعني مو للشعب !

وشنو يعني اذا الناس سكنت بمساكن صفيح ؟ المهم ابو نعال وابو الكبة وابو قندرة والأعمى والمجنون ساكنين القصور بالخضراء والصفراء والغبراء .

وشنو يعني اذا الشعب يبحث بين النفايات المهم دامبي وجماعته لديهم مايكفيهم من اموال والمهم ايضاً احزاب القذارة تملك كل أموال الشعب ولن تطلق للشعب شيء قبل الأنتخابات وبما يعادل سعر كرت شحن أو فخذ دجاج أو بطانية وفي أحسن الأحوال نفر قوزي !

وشنو يعني ان يدفع مجرم الأموال لجهات تحقيقية ليتم اطلاق سراحه في يوم المرافعة بينما بسطاء الناس يحتاج التعمق في التحقيق معهم لتعليقهم في المراوح وغيرها وانتزاع اعترافات عن جرائم لم يرتكبونها !

وشنو يعني اذا برلمان تعطل من اجل واحد كل وجهه براطم اخواني من الطراز الأول ؟ وشنويعني اذا برلمان علىة مدى اكثر من 10 سنوات لم يشرع قانون واحد فيه خدمة لعامة الشعب ؟ المهم ابو براطم سالم ههههه

وشنو يعني اذا انهارت الزراعة والصناعة ؟ المهم أن ساخت أيران وصنع في الصين تملأ اسواقنا!!

وشنو يعني اذا ماكو كهرباء ؟ المهم العودة الى عصر المهفة !

وشنو يعني ماكو ماي شرب ؟ يوميه نسمع الستوتات ومن يركبها ينادي ( ماي آرو ماي آرو ماي آرو ) وهذا النداء خلانه مانستعمل منبه الساعة لنصحو عليه ..

وشنو يعني . وشنو يعني .. وشنو يعني اذا انباع العراق ؟ المهم ابو نعال موجود وتباً للمستحيل . عاشت الأحزاب الأسلامية وهي تقتل وتسلب وتنهب وتعيش الخيانة والعمالة الى حد النخاع . وتباً لنا من شعب متخاذل يخاف الجبناء ..

[email protected]