الهمبلة

  حبيب العربنجي

طيحان الحظ همين بخت، ومحد يوصل له إلا إللي أموره عدلة ويعرف يتصرف…چا هي خان جهان ياهو يجي يصير طايح الحظ… ولكم ” وما يلقاها إلا ذو حظ عظيم ” .

تدرون هسة أحسن موضوع واحد يقشمر على العالم ويضحك على نفسه ويصير لوتي أبو الفسفورة هو موضوع النازحين، وهذا الموضوع صار طمبغة حكومية عدنا ومو من مصلحة أي مسؤول حكومي هذا الموضوع ينشال لو ينحل، إلى درجة صار الموضوع موجود بكل خطة حكومية لأن باب من أبواب الضرب بالدخل والبوگ والهمبلة الوطنية، وخذ لك أبو صلوح وشوف شلون ملياراته تتكاثر من ورا النازحين، أو أي أحد آخر، وحتى عمار الحليو مستفاد منهم بتشغيل أوتيلاته، وجماعة الأقلمة والدسترة همين، من مسعود وسطر الأسماء براحتك ترى ما بي حيل كل مقالة أوسخها بأسم هذا وذاك، المهم…هذا الموضوع صار كلش بايت ومحد ماكلها غير النازحين نفسهم…الوطن صار قطعة من النزوح…وياهو نلزمه قبل ما يعضنا يگول عوفوني ترى آني أساعد النازحين…لو الشغلة بالسوالف هسة چنا محتلين المريخ وننظلق خارج درب التبانة، بس مثل ما گلت كل شي بخت.

واحد من جماعة الهمبلة..خطية ، الجماعة ما تركوا له أي فكرة بخصوص النازحين، والمشكلة هذا المهبل الجديد هو مقرر الپورلومان العوراقي، إي نعم، وراح دوّر بأچياس الزبل مال الپورلومان حتى يشوف فكرة مزبلة هنا لو هناك بخصوص النازحين والنزوح والنازح عنه والمنزوح منه…والنازحات نزحاً …فالمصيبات أمراً…والكارثات خمطاً….فالأغبياء قولاً.

شي يگول هذا :

هذا الما أعرف شنو…دز رسالة لوزير التعليس العالي…يطلب إيواء النازحين (هو هيچ گال : إيواء ) في مباني الجامعات العراقية التابعة لوزارة التعليس…هسة أسكت …بس هي دودة لازم يحچي حتى نگول هو مو نايم في مجلس النوام…بس أكيد هو چان نايم وجت له دفرة من بغل في مجلس الدواب وفز وشاف مايكروفون وهناك ..الله…خلوني آني همين أصرح ! إحنا نركض يمنة ويسرة بلكن نعدل أمور الجامعات العراقية إللي شهاداتها صارت حالها حال الحفاظات الوسخة ، وفوگاه نحولها إلى مخيمات !! وطبعاً نعرف إن النازح گلبه مليان عالدولة وبس يريد فرصة ويفرغ كل قهر الدنيا والآخرة، يعني إذا دخل الجامعة بعد تعيش، ثلاثة أشهر ويطلع مظاهرة ويطلب تسجيل الجامعة بأسمه…هاي الحقيقة لازم نحچيها…بسبب فشل الدولة في إدارة موضوع النازحين النازح صار بس يريد فرصة وينتقم من الدولة…وحقه ومو حقه…آني مو ضد موضوع النازحين إنسانيا بس ضد هذا الموضوع وطنياً والهمبلة بأسم النازحين…أي مسؤول يشوف أسهمه نازلة في بورصة الشعارات يروح يتصل بأي مراسل يابة تعال وخذلك چم دولار عندي تصريح سخفي…والله يكثر السخافات… ويوگف و…طيط طييييط طيطططططط…وخلص التصريح السخفي.

وبعد ما صار التعليم في العراق أدوار وطوابق…الدور الثالث والرابع…وصار الدوام همين أدوار وطبقات…الدوام الصباحي والدوام الظهري والدوام العصري (تتذكرون عرگ العصرية ؟؟؟ ) وبعد ما صارت الجامعات مطبخ لطبخ الهريسة والقيمة والدهين والفسنجون …هسة نريد نحولها إلى مخيمات…وتعرفون المخيمات ووضعها…زبالة . تخيل هناك أكو إمتحان بالهندسة لمادة جريان الموائع…ويطب عليك واحد شايل سطلة ويگول “وين البوري محتاجين ماي !!” لو گاعدين بدرس التشريح ويطب عليكم واحد ويگول هاي لشة أخوي ! وراح تصير حياطين الكليات كلها : ذكرى أبو ياسين.. چنا هنا…وذكرى آريج…لا تنساني وداعتك حازم…وذكرى القلوب العطشانة…التوقيع…النازحات قهراً.. وتعال بعد دگ طبل حتى ما يظل بعير عالتل وتريد أحد يعترف بشهادتك الجامعية العراقية تشبع عفاط وأصلاً راح تشاركهم العفاط على نفسك وأنت الممنون.  خو ريحة الجامعات والكليات راح تصير ريحة خرائية وهاي الريحة من المستوى الخرائي للتدريس مو من غير شي..مو عبالكم، لا تسوون مشكلة عقائدية وعشائرية وفنية وجيوبوليتيكية وبراغماتية ولوجستية والسوسيولوجية وبيض لگلگية.

ولكم الجامعات بكل مكان لها حرمة..ويگولون الحرم الجامعي…يعني بيها قوانين خاصة وحرمة لازم نحترمها ، وقوانين الجامعات مو هي نفسها قوانين خارج الجامعات…رجاءاً خلونا نگول عدنا شي بالعراق بعده بحرمته…صح علي الأدبسيز لعب طوبة بالجامعات…بس مو يعني نجي إحنا فوگ الزراب نزرب، هسة هي مليوصة…خاطر إللي عنده خاطر يمكم…إذا ما عدكم شي تحچون بيه عوفوا شغلة النازحين…ما نريد لوصة أكثر من هاي..سعيكم مشكور، وأكرر كافي المزايدة بالنازحين ويا ريت لو هم ياخذون ويقبضون شي من هاي المزايدة، أشو هم من البؤس إلى البؤس وفلوس المزايدة تروح بطن هذا وذاك (من الطرفين الله وكيلك ). وإذا إستمر الحال هيچ…راح تصير جامعاتنا أكبر مورد للمواد الاولية لمصانع الحفاظات…وأكيد واضح وما يحتاج شرح…والله الموفج.