مساكم الله بالخير ، يا جماعة الخير ، والله الفيس بوك ، مشكلة! ، خاصة ، جماعتنه العراقيين ميكَعدون راحه ! ، خلوني احجيلكم شويه ، على المُرشحة ” ن.ك ” الحامل ، طبعاً أني بطريق الصدفة ، بالفيس بوك شفت صورة لوحدة حامل حاطه أيدها على بطنها وبالصورة علم عراقي ، أني كلت ويه نفسي يجوز اعلان لمستشفى ولادة ، أو بامبرز أطفال، بس شيجيب العلم ويا بامبرز الاطفال !! .. المهم أتضح أعلان طلب مساعدة إنسانية لانتخاب ” آم الولد ” حتى تصير نائبة جديدة بمجلس المحافظة ، بس مادري بالضبط يا محافظة دتشجع ” الخُلفه ” بادخال نائبات حوامل بين أعضاءها!.
بس تدرون يالربع شغله ! ..اني مادري ليش كَلبي من دون كل المرشحات صار ” رهيف ” عليها ! ، يمكن لأن حامل! أو البيبي يحتاجله مصاريف! ( حفاضات ، حليب ومميات ، حجلة ، ألخ ) مادري .. الله اعلم!.
زين ، هسه مرشحة وفتهمنه ، حاطة ايدها على بطنها دتكَول حامل وهم افتهمنه ، بس المفتهمته من “ن.ك” يعني عبالها مجلس المحافظة مستشفى ولادة ؟! لو حضانة اطفال؟! لو دار رعاية …؟! .زين سؤال اذا فازت ودخلت المجلس! تاخذ الجواز الدبلوماسي وحده لو وياها “البيبي” ، ينطو راتب؟! ، بخت أبن الــ….!! أعوذ بالله منك يالساني.
عيني ام الولد أتمنالج دخول ميسر للمجلس وولادة سهلة ..أما أنتو يالعراقيين أعتبروها حالة انسانية ،هي ضلت عليها ، مو أحنه كضيناها انسانيات ، ثم هــــو المجلس والبرلمان ..أغلب الدخلو بيها حالات انسانية ، وسمعت طارش يكَول بالجديد رحيفتحون قسم للولادة النسائية!!!!!.. ( وينك أبو نعال ! ) ،الله وياكم أغاتي.
محمد الياسين : [email protected]