حبيب العربنجي
والله هسة محتاحين حجي راضي يفهمنا شنو الموضوع، لأن حتى خان جيغان مو هيچ، ولكم مضروبين الچلوة، القوات التركية موجودة بالشمال من ثلاث سنوات وبغداد ما تعرف، وبس حست من صار تبديل القوات ( وهذا مو عن طريق المخابرات بل عن طريق تسريبات إعلامية وشهود عيان) ، لا والخوش حچي بهذا الموضوع، اكو كاكا پورلوماني يگول : هذا كوات موجووود داخل كردستان مال إحنا من زمان، قبل سنة ونص عدنا بأربيل ” لا حظ عزيزي المشاهد قبل سنة ونص، يعني تماماً وي بداية سقوط الموصل. خليك وياي أبو دريد، راح تجيك السالفة. إي عيني مو أنت بالبرطمان يا كاكا، ليش ما حچيت بهازا الموزوء ! مو أكو قسَم برطماني يجبرك على الموحافزة بأمن عير – اق، هسة مو عير – اق بس هذولة كاكا كانوا عدكم، عد كاكا بارزاني إللي عاف كل مشاكل الأقليم وراح يتفرج على سباق فورمولا ون ونهاية موسم الراليات لسنة 2015، والله زمن يا سلاحي، صدگ گالوا من هوش للماكنتوش، وهسة البارازني من براري لفيراري !
ومن السباق، اخذ البارزاني محرك توربيني، وأنطلق إلى الرياض، وباس هالمرة الإيد مو الچتاف، وبنفس الوقت تحرك مؤسس دولة داعش السلطان أردوغان نحو قطر، وهناك إستلم شهادة دكتوراه وبراءة إختراع لإختراعة دولة داعش، وطلع القرضاوي يگول ” إن الله وملائكته يباركون أردوغان…يا ايها الذين أمنوا باركوا أردوغان وسلموا عليه تسليماً ” ، والبارزاني إستلم 8 مليارات دولار أمريكي، إي ثمانية مليارات، في مقابل قبول تحرك القوات التركية حول الموصل لمنع تقدم القوات العراقية لتحرير الموصل، وبناء مركز إستخباراتي تركي متقدم لنقل كل تحركات وإتصالات الجيش العراقي وخاصة بعد ما طلع وزير الدفاع وكشف خطة تحرير الموصل في شفافية كبيرة تليق بتحركات الجيش وإفشاء الأسرار، مو هيچ تصير الأمور فالتون من نجيب واوي ونشد عليه ماطور ونصيحه سيد الوزير، گال هذا الوزير الفالتوني إلل هو نسيب النجيفي ويهمه بقاء الموصل تحت الإحتلال، گال: “خطة تحرير الموصل راح تكون من ثلاث محاور”، وحدد المحاور ونطاهم الإحداثيات، وطبعاً أقليم كردستان أحد هذه المحاور، وكانت إشارة مهمة لأردوغان ليتحرك لإفشال هذه الخطة.
يمعودين ماكو شرف بلكن نوزعه بالحصة التموينية ! نريد أشوية شرف عد هذولة، ترى وداعتكم ترى الگواويد زعلانين وراح يرفعون قضية دولية ضد المسؤولين العراقيين لأن دا ينافسوهم بعدم الشرف، ولكم حتى على هذا لاحگين الناس، حتى بالكلچية على رأي أياد جمال الدين الرائع.
شوفوا وجود القوات التركية بكردستان وي بداية التحرك لإحتلال الموصل، هاي وحدة ، تحرك القوات التركية نحو جنوب الموصل قبل يومين، هاي الثانية، ضرب تهريب النفط إللي يشترك فيه أبن مسعود وي إبن أردوغان (مسرور – بلال) كان نتيجته لإسقاط المقاتلة الروسية هاي الثالثة، والتوجه التركي – الكردي إلى قطر- السعودية، لبناء جبهة ضد هذا الضرب هاي الرابعة، وكل من قبض ورجع، البارزاني راح يسوي مشاكل فوگ المشاكل، وراح يوجّه بتأييد الكتلة الكردية بالپورلومان لصالح مشروع الحرس الوطني إللي هو بداية لتأسيس جيش لدولة سنستان مثل ما البيشمركة هو جيش دولة كردستان، وراح يكون الحرس الوطني إشارة لتدخل السعودي في العراق من باب حماية الدولة الفتية من الاطماع الإيرانية وهاي الخامسة…شوفت السالفة ؟ مو گتلك راح تجيك بس صبرك عليّ أشوي.
ويطلع إلنا أبو يسر ويگول ما نسمح بوجود قوات أجنبية برية ونعتبر وجودها عملاً معادياً ! أكو طواطة ؟ لأن ما اعرف أعفط بسبب سنوني الواگعات !لا يا شيخ، خوفتني، وخاصة أنت لابس دشداشة مغربية سودة وحاط عرقچين أسود وطالع چنك باتمان بعد تشريب باچة ، ناسي كل مشاكل العراق الإقتصادية والإنسانية والسيادية وحتى الخرائية لأن طامسين بالخرا بالعبيدي وأبو دشير والحرية بسبب مشاريع عبعوب – ذكرى، ورايح للمسيرة المليونية، هسة ما تگوللي أنت وجودك ضمن 26 مليون شيزيد وشي ينقص ! أبو يسر أنت خوش خامة بس المشكلة إللي يعجنك خبيث، يابة ما تشوف الخربطة بالدبلومساية العراقية وماكو أي وزن للعراق عد أي دولة، ولك رئيس الجمهورية عباله بعده ساركوزي هو رئيس فرنسا ! راح وإجتمع وياه وعزمه على زيارة بغداد ! وعباله رئيس جزر القمر هو فلاديمير بوتين، عاف كل الدنيا وراح إجتمع وي رئيس جزر القمر إللي هو نفسه حاير ما يعرف دولة جزر القمر عربية لو أفريقية مو عربية ! أبو يسر ما تصير إلنا چارة إذا المارد يحرك المواضيع من القمقم.
چان من الممكن لو عدنا وزارة خارجية تعرف شغلها، حشد جهد دولي ضد تركيا أثناء وجود الرئيس معصوم في فرنسا (فؤاد معصوم يذكرني إسمه بلاعب عراقي چان أسمه آرام برصوم أيام چان المنتخب يقبل المسيحي مثل دوكلص عزيز وبرصوم وشدراك) خاصة أن زيارة پاريس صارت بعد إسقاط الطيارة الروسية المقاتلة، يعني لو عدنا دبلوماسية وخارجية چنا نتحرك بإتجاه ضغط دولي قوي ضد تركيا ونجبر
أردوغان وإختراعه الداعشي على الهزيمة بإصدار قرار دولي ملزم للحصار عن داعش والحدود التركية السورية، مثل ما نجح الحصار ضد العراق 13 سنة وما دخل عدنا لا قلم ولا ورقة، چنا نگدر نسوي هالشي خاصة أن دولتين بمجلس الأمن روسيا وفرنسا چانوا في ذروة الإستعداد للتوجه الدولي لإصدار أقوى قرار ضد داعش بعد هجمات پاريس وإسقاط الطائرة المدنية الروسية والطائرة الحربية الروسية…هم زين الله رحم بحالنا وفرنسوا ميتران ميت، چان تصير كلش فشلة يروح الرئيس مأصوم يجتمع وي ميتران وما يجتمع وي شارل ديغول.
ماكو چارة ماطول هذا أردوغان عايفيه يتحرك براحته، هو وربعه، أقصد أردوغان ومسعود إللي صار مثل راقصة سترپتيز ينزع بحسب الدفع، ويتحرك على الأنبوب بحسب طلبات إللي يدفع هواية، ولو مو هو، چان ما راحت الموصل بإتفاق أردوغاني – بازراني – نجيفي، تسليم الموصل لداعش في الطريق لعودتها للسلطنة العثمانية في مقابل تسليم كركوك لبيشمركة، وبتنفيذ قيادات فاسدة في الجيش من أعلى قيادة ( المالكي) لحد أزغر رتبة في ملف الفساد العسكري مال قضية الموصل (التسلل 179 النقيب…..).
أردوغان…من أول يوم فاز حزبه الإخواني بالغنتخابات التركية قبل سنوات گال:
“مساجدنا…ثكنات جنودنا، قبابنا خوذاتنا، منائرنا رماحنا…والخلافة هدفنا “.
وتريدون أكثر من هذا دليل على أن داعش…صناعة أردوغانية !
ترى صدگ ما تستحون إذا تنكرون براءة الإختراع هاي إللي إعترفت بيها قطر، وتنطوها لغير ناس…إشگد أكو ظلم بهالدنيا.