برقية عتاب : من محمد العاگول إلى الجنرال السيستاني

  حبيب العربنجي 

من : محمد العاگول مؤسس جيش محمد العاگول

إلى : الجنرال السيستاني – كل شي هو

يابة مولاي…بالأول أعرفك بنفسي..آني عراقي محمد العاكوب بس ما أعرف ليش صرت محمد العاگول..يجوز لأن الجماعة إللي خليتهم في فرقة الهجانة لحماية الجزيرة چانوا مثل العاگول بحلگ العدو ، المهم يا مولاي، آني جاي أعتب عليك، لأن ظلليت آني من سنة 1947 ينضرب بي المثل في الخربطة وعدم إطاعة الأوامر، تالي تجي حضرتك مولاي وتأسس جيش ينافس جيشي. إي ليش ؟؟ هسة منو يمك ؟ فرد يوم جيت دگيت بابك وگتلك إنطيني مما أنطاك الله ؟ فرد يوم طالبتك تنطيني روبية لو عانة من الخمس ؟ ليش هسة جاي تاخذ المثل مني وتسوي جيش ينافس جيش محمد العاگول !

مولاي الجنرال :

بكل جيوش العالم الجيش الوطني ياخذ أوامره من القائد العام للجيش ، ولا حتى بدولة بوتان إللي يخسرون بالطوبة خمسطعش صفر ماكو واحد معمم ينطي أوامر للجيش بعدم مغادرة المواقع ! چا هي ولية على گولة أم عامر لو شنهي ! هسة أدري بيك وحدك لا شريك لك بالعراق المرجعياني السيستاني الكردستاني، بس لو تسمح لي…شنو صفتك العسكرية بالعراق؟ أدري بيك خريج ويست پوينت بس بطلت وفضلت العمامة على البيرية، وأدري بيك مستشار فوق العادة لحلف الناتو وراسموسن، بس مال تنزل قدرك وجنابك لمستوى الجيش العراقي وتنطيهم أوامر، فهاي مو قدرك مولاي ولا يليق بتاريخك العسكري إللي ماخذ بيه شهادات وأنواط أكثر من أنواط إللي چان يعلگها جعفر النميري على سترته .

مولاي

يمعود دخيلك لا تنشغل بالجيش وتترك أمور الدين، ترى نتيه، نگوم نصلي خمسين ركعة باليوم، لو نصوم عشرة أشهر، ترى هو شهر مشگوگين عالبطانة، وتالي عشرة أشهر، الله وكيلك كلنا لجهنم داخرين إذا تعوف الدين. ترى يجون هتلية ويدمرون الدين. راح يگولون ماكو خمس!! يعجبك هالشي ؟ ترى السادة والمربعات والمقلم سوا يصيرون عالحديدة والرنگات الله وكيلك. هسة عوفك من الجيش ، يمعود مولاي إذا تنشغل عنا ترى ما نعرف القبلة من وين لأن البوصلة حرام وما نستخدمها ولا نعرف شلون ننام وي زوجاتنا وشلون نقضي الوطر… مولاي بعدين أكتبلك عالخاص فهمني شنو معنى الوطر لأن كل مرة أگول للمرة أريد أقضي الوطر تگول قابل آني ميز …ذاك هو الميز روح أقضي الوطر فوگاه.. مولاي أخاف ثنينا آني والمرة فاهمين الموضوع غلط.

مولاي الجنرال العظيم

ترى العتاب من المحبة مو تضوج، ضوجتك بالدنيا، يمعود أخاف تضوج عود منو يدير باله عالرعية، مو إحنا كلنا خرفان بالقطيع مالتك…وشوف إسمع : بااااااااااااااااااااع…وداعتك عندي باع يشگ الگاع بس أؤمر. أدري هسة الجيش العراقي من أكبر ضابط برتبة زردة ركن إلى أقل ضابط في صنف القيمة مو لازم عدهم مرجعية عسكرية هي وزارة الدفاع ورأس المرجعية العسكرية هو القائد العام للقوات المسلحة ؟؟ مو صح مولاي لو آني غلطان، إذا غلطان إتحملني لأن محصور وإذا ما تحملتني ترى مو خوش، فليس على المحصور حرج، بل له خرج ، لعد مولاي جنابك شنو توجه أوامر مرجعية عليا للضباط في الجيش العراقي والمراتب بعدم ترك مواقعهم والمشاركة في أربعينية الحسين ! مولاي هذا تدخل في شؤون العقيدة ! لو لا سامح الله واحد من هذولة الضباط إستشهد بقنص داعشي وهو غير مشارك بالأربعينية ترى گبل لجهنم وبئس المصير والمسير، لأن شهادته ما بيها ختم الزيارة، يعني ملغية، وتجي حضرتك تريد شهادته تروح بولة بالشط ( العفو ذكرت كلمة بول في حضرتكم المقدسة بس مثل ما گلت، ليس على المحصور حرج).

مولاي الجنرال

بإسمي وبإسم كل القادة العظام في تاريخ الجيوش من يوليوس قيصر وهاني بعل والأسكندر وخالد بن الوليد ومحمد الفاتح والسلطان سليمان والسلطانة هيام وناپليون ورومل وماك آرثر وپاتون وجورجي جوكوف وموشي دايان وآرييل شارون و الملا مصطفى وهشام صباح الفخري وعبدالجبار الأسدي وماهر عبدالرشيد وتشوارزكوف ( ماكو إعادة )، أتقدم إليك بعتاب وأطالبك بأن تعيد لجيشي جيش محمد العاگول مكانته التاريخية كمضرب مثل في جيش خربطة في الملابس كل من بكيفه، وجيش خربطة سلاح همين كل من بكيفه، وجيش عدم إطاعة أوامر همين كل من يسمع أوامر ربعه وحزبه، مرة نسمع أبو مهدي المهندس (صدگ هو گرايب فؤاد المهندس وإبن عمومة ماجد المهندس لو بس تشابه الأسماء ؟ ) ومرة أوامر مهدي الكربلائي . مولاي ترى آني ما طلعت من الدنيا بغير هذا المثل، التاريخ يعرفني من هذا المثل، وأنت مولاي الجنرال ما محتاج شي، أشو كلك على بعضك حلو، الكل يعرفوك ويسبحون بحمد حكمتك وأفكارك وفتاويك العظيمة، والخمس يوصلك وإحنا الممنونين، وكل رؤساء العالم يجون يمك قبل ما يروحون لبغداد، يعني ما محتاج شي، دخيلك مولاي، عوف لي المثل وخليك بأمور الدين والمرجعية، ترى مثل ما گتلك، بس تعوف الدين وتنشغل بالعسكرية، يصير الوضع فيطي ما لا والي… وبعدين ترى خايف عليك، أخاف تروح للعسكرية وبعد ما يسرحوك، عود شي نسوي ذاك الوكت ؟ الله وكيلك…داعيك خمسطعش سنة وما طلعت إلا من إحترگ التجنيد مالتنا.

مولاي

مال اللبن للبن…ومال الماي للماي.

أخوكم في العقيدة العسكرية

محمد العاگول (العاكوب سابقاً ) – ليس لدينا فرع آخر