حبيب العربنجي
أدري بيك بابا نوئيل ملليت من الأمنيات العراقية إللي ما تخلص، أصلاً الأسلحة المحرمة دخلت حتى في أمنياتنا فصارت أمنتيات عنقودية، بس ننطيك وحدة تصير عشرة، وإذا ما تحققها العشرة تصير ألف لأن يا بابا مثل ما تعرف الحسنة بعشر أمثالها، وتحقيق أمنية لكل عراقي هي حسنة، لا تتعجب يا بابا لأن هسة وكت الدعشنة ولازم أحچي وأقنعك بالطريقة الإسلامية !
باباتي
چانت سنة 2015 سنة داعشية، يجوز لأن چان يدعون ربهم بليلة قدر مالتهم وأنت مريت بالسماء الدنيا وسمعتهم وحققت أمنياتهم، لأن صرنا متأكدين مثل تاكيد الناطق العسكري العراقي “تأكد لدينا سقوط طائرة ” فمتأكدين إن كل الدعاء العراقي يروحللسپام ومحد يگلبه، بس أنت أنت وحدك بالملعب وبالسما تجي تلتقط إشارات دعواتنا وأمنياتنا فتلمها وتقراها وتعلق عليها، يمعود غيرك حتى اللايك ما يسوي يا بابا أو تريد أصيحك عمو بابا ؟ لا هاي تسبب إشكالات إصطلاحية شائكة معقدة في تداخلها البنيوي مع إسم المدرب عمو بابا، خلينا على يا بابا مثل ما چانت بيداء تصيح على أبوها في أغنية ” يا بابا” من ماما تنتظر بابا بوجه الصبح .
باباتي
أمنيات هذي السنة هي أمنيات تناسب عصر الدعشنة والتدعوش ، ترى مللينا من شگ زياگنا وچتافتنا للعباس، ومللينا من شمر چرغد أمهاتنا بالگاع حتى نشوف إلنا حق، راح أجيك بالعدلة، راح أوگف بالسطح بهذا البرد، آني وربعي أعضاء مليشيات لواء صيد بابا نوئيل ، وهي مليشيات تابعة لجبهة نصرة الأماني العراقية، نوگف لك بالسطح، ونعرف يا ساعة تمر، لأن أنت مضبوط بمواعيك مو مثل غير جماعة، يگولون نجيكم ونسمع دعاؤكم ونحققه، وهاي مضروبين دبة وداعتك من 1438 سنة زائداَ 53 مال قبل الهجرة، وكل مرة دبة شكل، وآخر هاي الدبات ردنا مدنية وحضارة، تالي الجماعة رجعونا لعصر سوق عكاظ وبيع الجواري والتعامل مع دينار فضة وذهب، وديوان الحسبة، بس باقي تطلع إلنا هند بنت عتبة في لقطة من فلم داعش في نينوى، نوگف لك وكل واحد شايل ناموس اللواء المقدس، وكل ناموس مكتوبة بيه
فزعة شكل، أكو فزعة يا لثارات الأمنيات العراقية، وأكو فزعة، يا ثارات الرواتب العراقيين، وفزعة يا لثارات أسعار النفط، وأكو فزعة غير شكل وهي فزعة ” كافي بعد مصختوها” وهي راح ندزلك بيها مانوال وكتب وكتالوج حتى تعرف شلون تفهمها وتفك لغزها وتركب قطع الپزل حتى تتوضح الصورة.
وشوف يابابا، رتب حالك زين مو بعدين تفوت وما تلتقط أمنياتنا وتگول والله الشبكة ضعيفة، ترى وداعة إللي ألف أغنية جنگل بيلز وإللي لحنها وخلاها أغنية فرحة كل راس سنة، إذا ما تلم إشاراتنا وأمنياتنا، ترى كتيبة قنص بابا نوئيل وهي إحدى تشكيلات لواءنا البطل واگفين بالقناصات الإيرانية وبالگصة يحطوها وهم يغنون اغنية غزوان الفهد ” إحنا ما بينا مخربط …إللي يدگ بينا يتورط…نيشن صح وما نغلط…بالگصة نحطها..ها ها.. بالگصة نحطها” ..أي بابا..هاي أغنية مو عبالك نشيد كتيبة إعدامات گوستابو، مو أنت ما تدري الأغنية العراقية بعصر الداعش صارت كلها بالگصة، وأكو هسة أغنية راح تنزل 2016 تگول :
لا تلعب وي هذا وذاك
راسك اطيره وألعن سلفاك
وعندك حساب واصل يا بابا، راح نبدي وياك وطرح خمسة وأحنا متراهايين.
باباتي
ما ظل شي مع كتبنا بيه أمنية، خو روح لمستودع الأماني العراقية إللي موجودة بالسما، أهوووووووووو شراح تلگى وتشوف موجود هناك، تعرف يا بابا، إحنا اليوم إللي تمطر، نلگى أمنياتنا بين حبات المطر، وهاي تسبب إلنا حزن وألم، لان دليل أن مستودع الأمنيات إنترست وسيستم إيميلات سپام ما گام يشتغل، فظلت إيميلتنا حايرة تفتر بالسما ورجعت إلنا وي المطر، ومن تجينا عاصفة رملية، تجي جايبة وياها امنياتنا إللي ظلت حايرة بالسماوات مع لزگة وي كل أمنية ” هذه بضاعتكم ردت إليكم يا قشامر ” ،بابا…صدگ إحنا قشامر لو هاي من بابا الملاطفة مثل ما نگول لواحد كلش ذكي : ولك نغل شگد تفتهم ؟؟ أرجو التوضيح…لان إذا صدگ قشامر ترى هذا يعني ضياع الجهد والمسعى (راج أخونا الجعفري للتوضيح عن مثل هذه المصطلحات) ، وإذا مو قشامر يعني إحنا أغبياء…گل إلنا الحقيقة وحطها بالگصة.
بابا نوئيل
هاي مو أول مرة أكتب لك، إرجع إلى أرشيفك الوطني وشوف كم مرة كاتب لك، ترى وصل السيل إلى..زبى…بابا مو تقرا وصل السيل إل زبي وتسويها قضية عشائرية، الزبى غير الزبي، بس تعرف حقك تغلط هيچ غلطة، لأن واحد طلع وقرا بيان وگال : هالمرة عير ما شايفين گبل ! ولحد هسة أريد أعرف هو قرا صح لو ما شاف نقطة !
باباتي
راح أنتظر لحد الدقيقة الأولى من سنة 2016 بتوقيت مكة المكرمة بحسب توجيهات عصر داعش، إذا الوضع ظل مثل ما هو فيطي ترى الأوامر جاهرة لكتيبة أبو عيسى السنتاكلوزي والمجاهدين بهذه الكتيبة الإنغماسية بالإنتقام منك في غزوة ” بابا نوئيل” ترى ساعتها مو تبيع إلنا أفلامك وتگول لهمآني همين مثلكم وشوفوني لحية بيضة وكرش بحسب سنة السلف الصالح مالتكم، أهم شي الكرش، ترى هذي اللأفلام ما تفيد، ساعتها يوم لا تنفع لحية ولا كروش، إلا من جاء للخليفة بمال وعروش حتى يلعب لعب.
وهابي نيو يير بابا…بس لا دبة الله يخليك، ترى نزوع عليك من كثر ما ماكلين دبات!
الرفيق
حبيب آل عربنجة الأول والآخير
عن مليشيات : مراقبة بابا نوئيل
إحدى تشكيلات لواء صيد بابا نوئيل المرتبطة بقيادة عمليات السماء
المتجحفلة مع هيئة حشد الأمنيات
جبهة نصرة الأمنيات العراقية
بغداد – يوم الجمعة – مع صلاة الجمعة والخطيب أسمعه من شباك البيت يگول : نارُ وقودها الناس والحجارة
إنلاصت والحمزة !