آخر تحديث:
كاظم اسماعيل كاطع
زعلان بس يازعل لمن ترد للصدك
كبل المنادى أجي.. وإشلون جية اجي
اركض ركض محترك
يالذاتك بريتي..وين الكه مثلك هوى
لولاك والله اختنك …
هي شراكة نفس لو سكت قلبك سكت قلبي
ولو يدك قلبي يدك …
لو ما وكتنا صعب ما جان ابد نفترك
كلمن مشه لحالته …
واحد سكن بالغرب.. واحد سكن بالشرك
كل هالمسافه..البعد
وسوالفك تنسمع جن تونا حلك بحلك
والله عشقنا عشك …
يامن مقدر على غيرك فصاله صعب
جندوب اخيط واشك
حنيت انه لشوفتك ..
وإصبرت بس ماصبر قلبي وصرخ..راح اطك
جاباني الك واذعنت
جيتك بليلة شته
ظلمة ومطرها رشك
واشبعده صار الدرب..خوف
ورعيد وثلج.. وجفوف ادية زرك
إببابك طحت.. ها كمت …
ضميت ادية وردت عَ الباب بالروح ادك
بس كالوا إلمن تدك كلمن مشه لحالته ..
واحد سكن بالغرب.. واحد سكن بالشرك ..