مطلوب فوراً…إمام

  حبيب العربنجي 

أتمنى لو بكل مدينة عراقية عدنا إمام حتى لو إمام فضائي، مو مهم ، بس نريد إمام ، لأن طلع الحل في الإمام…إي صدگوني…أكيد هسة تگولون هذا ده يخربط…هو منو إللي ما يخربط بالعراق ، خلوني آني هم وياهم بلكن يصير براسي خير، مرة صار براسي خير بس أشو صارت وياه گشرة، رحت أشتريت شامپو سنسن، ومن يومها راحت الگشرة وما شفت خير.

المهم…أريد إمام لمدينتي التعبانة، والمشكلة مدينتي ما بيها ولا نعل إمام، وما أعرف شلون مجلس المحافظة راح يگدرون يجيبون إمام لمدينتنا…بس آني كتبت عريضة عد العرضحالچي عباس حتى يجيبون إلنا إمام، لأن الأنترنت چان ما يشتغل حتى أدز أيميل للسيد رئيس مجلس المحافظة، إي لعد شلون هسة كلها الحكومة الألكترونية والتوقيع الألكتروني وإيميل رايح وإيميل جاي، أصلأ جارتنا أم شتيوي صار إلها ثلاثة أيام توزع خبز لأن رئيس الجمهورية…إي رئيس الجمهورية دز تهنئة لشتيوي بصفحته بيوم عيد ميلاده، الجماعة عايفين سعر النفط والدعشنة ومگابلين الفيسبوك منو عيد ميلاده، من نعلة على الماشايف …أقصد أم شتيوي مو فخامته.

وطبعاً الإمام ما يشتغل زين إلا إذا ميت وشبعان موت، لأن بهيچ حالة كل الطاقة الإمامية الإيجابية تطلع وتشوفون العجايب والمكرمات. بداعتكم ما أحچي إلا الصدگ، وبراحتكم عاد تعرفون الصدگ من الخرابيط. شوفوا شلون، نريد مجلس المحافظة يجيبون إلنا إمام ميت  ويا ريت إمام مستشهد بمعركة الچفچير بسبب الخلاف على طول اليدة لو عدد الزروف بالچفچير، لأن هيچ إمام يضمن بكل بيت عنده أتباع لأن ماكو بيت ما بيه چفچير إلا إذا أكو جماعة يديرون التمن بالچمچة عود براحتهم، أولئك الذين ظلموا…وما ظلمناهم ولكن كانوا لتمنهم يچمچمون، ومن نجيب هيچ إمام وصاحب قضية چفچيرية خالدة راح تگوم كل أم بيت من كل مكان تجي مشاية زيارة هي وجهالها وطبعاً أبو البيت الشرعي والفيسبوكي وياها، وراح تستقبل مدينتنا هاي الأعداد الچفچيرية المباركة، وراح نشوف أن مجلس المحافظة وبمكرمة إلهية أو حكومية ماكو فرق ” الحاكم ظل الله في الأرض مثل ما قرينا في المنهاج الثقافي المركزي ” راح تگدر تحصل على أربعين ألف شرطة حماية لمدينتنا إللي بعمرها ما شافت حماية ، أصلأ مرة أبو مهند راح يشتري دبة غاز، رجعت الدبة لوحدها للبيت وأبو مهند لحد هسة ماكو، شوف شلون حماية للدبة !…وراح نگوم نشوف مترو الأنفاق يوصل لحد باب كل بيت بمدينتنا، إشوكت ومنو وشلون بينتوا المترو مو مهم، ونشوف القطار يوصل لكل موقف باص، أصلاً تگدر تخابر بالموبايل ” أكو خلافات جانبية نخابر على آسيا لو عراقنا بس راح تنحل ” ويجيك القطار للدربونة، لا تگول شلون، المكرمة الإلهية تگدر تسوي من العگرگة  ضفدع بداعة الخلاني، ونشوف شلون مدينتنا إللي ما بيها أوتيل راح تگدر تستقبل سبعطعش مليون مشاية للإمام الچفچيري، ونشوف كل بيوت المدينة تحولت إلى فنادق درجة سبعة نجوم، ولك لا تظل تگول شلون، كل شي من اجل النصر، وكل العراق  ينادي چفجير عز بلادي…وراح نشوف وزارة النقل عافت الدنيا وزهدت بمشاكل الحياة وجابت إلنا ألفين باص، ولو ما محتاجين، بس هيچ كشخة، يجوز أم نبيل تجيب باص هدية لإبنها بعيد ميلاده باص وخلي يلعب بيه بحوش البيت، خاصة بعد ما سدت بالوعة الخرة إللي چانت بالحوش وتخاف نبيل يوگع بيها وهسة تطلع كل الخرة للشارع، هسة ياهو أهم سلامة نبيل لو الدربونة ! وبعدين ليش چم نبيل أكو بكل العراق ؟

وراح نشوف وزير الدفاع…إي وزير الدفاع إللي إحنا كل عمرنا مستوانا فرق الدرجة الثالثة، يعني مسؤول شعبة قيادة الحزب، لو مسؤول البطاقة التموينية يزورونا، مو وزير الدفاع ! إي راح نشوف وزير الدفاع يفتر فوگ بيوتنا بالهليكوبتر وينزل يبوس بينا…هاي كلها بركات الإمام الچفچيري إللي إستشهد في ثورته الچفچيرية. وراح نشوف من نفتح البوري يجينا نفط وبنزين، وهم زين آني عندي بوري بالحديقة لان شلون أدخل السيارة للمطبخ حتى أخذ بنزين ! خو الماي لا تحچي، بطالة ماي آفيان راح توصل إلنا على عنوان كل بيت وياها بطاقة إعتذار عالتأخير !

وراح نشوف مدينتنا إللي بكل خرابة أكو مطار للذبانة شلون راح تستقبل أكثر من 130 رحلة طيران باليوم ، بيا مطار؟؟؟ صدگ تحچي ما تعرف بيا مطار !! يابة هذولة كل طيارة تجيب مطارها وياها، إي چا شلون..مثل ما أكو طيارات إرضاع جوي ” إشگد عيب هاي الشغلة ” أكو طيارات مطارها منها وبيها…قبل ما توصل تنزل تفتح التايرات وتنزل المدرج، وهيچ تصير حياتنا حلوة وماكو أي مشلكة!

يا رب …إجعل كل أيامنا أيام إمامية مباركة… وچثر من الإئمة حتى بالمرحلة الأولى يصير لكل محافظة إمام، وبعدين نشوف تگدر تسوي بكل دربونة إمام وأنت أبو الأجاويد لو البقية في العدد القادم، صدگ أكو عدد قادم لو لا ؟؟ يا رب إجعل لنا إماماً نتبعه فيحول مدينتنا من المزبلة إلى موناكو…صدگ أمير موناكو جاله توم قبل يومين ولازم عنده خوش إمام فستوقي يتدخل في الامور الجاجيكية…ويا رب إجعلنا من المؤممين ..تأميم نفط لو تأميم شفط المهم نريد تأميم…

يا ايها الذين تزبّلوا…إذا أردتم الحياة فأسألوا مجلس المحافظة أن يأتيكم بإمامٍ بيّن…أولئك الذين فازوا في معركة الچفچير ولهم كرامات إمامية تحول المنتخب العراقي إلى منتخب ألمانيا، ويحوّل همام طارق إلى ماريو غوتزه…والله ولي التوفيق…وهمين الموفج..يا معين!