حبيب العربنجي
قريت الخبر قبل 23 ساعة وأربع دقايق وثانيتين بحسب توقيت گرينيتش، والتوقيت بهذي المقالة مهم جداً والدقة همين لان الموضوع عن بريطانيا. ومن ساعة قرايتي للخبر وآني دايخ دوخة الذين كفروا وبالأسحار هم يقندلون أو ينشغلون بالفيسبوك ما دام الخاتونة نايمة.
الخبر يصدم الجميع بقوة إنطلاق سيارة فورمولا ون بسرعة 703 كليومتر وتضرب عصفورة وگعت حنطاية من منگارها لأن حظها مثل حظ العراقيين ونزلت على حلبة السباق حتى تاخذها، وتضربها السيارة ، بهيچ قوة الصدمة. الخبر هو أن مركز الإحصاء البريطاني قدّرت سعر بريطانيا العظمى بكل ممتلكاتها وجامعاتها وقصورها وعقاراتها وسياراتها ومتنزهاتها ومتاحفها وحتى وي كنوز الملكة وساعة بيگ بن وجامعة أوكسفورد وجامعة كامبريدج، كلها بسعر ثمانية تريليونات و تسعة وستين مليار جنيه أسترليني فقط ، وفي حال أكو واحد يشتري بريطانيا بهذا السعر راح تكون حصة كل شخص بريطاني من هذا البيع هي 125 ألف جنيه أسترليني، ونصيب كل عائلة بريطانية هو 302 ألف جنيه أسترليني ( يبلغ سكان بريطانيا بهاي اللحظة المباركة في تاريخ البشرية 64 مليون بريطاني وأشوية ).
ها يابة…شگلنا…أدري بيك بشنو تفكر…جاي لك بالطريق.
شوف..مجموع الدولارات إللي إنباگت من خزينة البنك المركزي بيوم 9 نيسان 2003، وي الدولارات إللي نثرها إبن العوجة على حركات (التحرر) الأفريقية مال بريتوريا إللي لحد هسة ما أعرف وين هي وأريتيريا إللي بأول يوم إستقلالها گالت إحنا لا عرب ولا إلنا علاقة بحزب البعث رغم أن الخايب جاسم الزبيدي تلف عمره في تصوير مقاومة الجبهة الشعبية لتحرير أريتيريا، مع مجموع ما إنباگ وإنسرق وإختلس في عهد حكم العمايم والمحاصصة منذ 2003 وهو في أصدق الروايات يتجاوز 820 مليار دولار، فراح يكون مجموع ما إنباگ وإنسرق من الاموال العراقية يعادل تريليون جنيه إسترليني بحساب فرق العملة بين الدولار والإسترليني . يا حلااااااااااااااااااااااااااااااااااوة ، يعني هسة چنا نگدر ندفع مقدم شراء بريطانيا ونقسط الباقي على بوگات الحكومات الجاية ! يعني چان هسة طنعش ونص بالمية من مساحة
بريطانيا وكل شي ببريطانيا تصير مالتنا ، وبعد لا نحير بحر الصيف ولا بكهرباء أكو وماكو ولا برؤية هلال العيد إللي نطرناها والحصاد غيوم، ولا برؤية سايبا في شوارعنا لأن كل التكسيات راح تصير رولز رايس، بكيفي ، ونجيب هدايا التخرج سيارات جاگوار، وهدية النجاح بصف السادس بكالوريا قبول بجامعة أكوسفورد ! قبول شنو هي الجامعة مالتنا ، وچنا نخلي ساجدة عبيد وأغانيها (خاصة أغنية عجوز البيت سكرانة ببطل بيرة) ضمن مقتنيات قصر المتحف البريطاني همين بكيفي، وچنا نسمي نادي الأمانة بنادي أمانة يونايتيد، ونخلي بوبي شالتون يتحسر يگعد يم علي عدنان، ونخلي أليكس فيرغسون يتحسر يصافح حكيم شاكر.
هي هاي إللي يگولون إللي ما يعرف تدابيره حسرته تاكل تصابيره، والمشكلة العويصة (من نعلة على العوص بن العاص) إن هذولة إللي باگوا فلوسنا وبعدهم يبوگونا كلهم لابسين ستر وجاكيتات وبنطلونات جيوبها أبد ما تنشگ ، إي حظ الحلو، فرد يوم لبسوا جاكيت مال لنگة أو سترة مال بالات لو بنطلون مال الحجي حتة من تخلون الفلوس المبيوگة بجيوبكم، بلكن، إي بلكن توگع شدة من هذني المليارات ، ولكم وين راحت الفلوس، أشو حتى مشروع بسماية طلع بس إعلان وكل شي ماكو، صدگ مشروع بسبسي، ومشاريع الكهرباء والمستشفيات، ولكم ولد القنادر أكو مستشفى بكل الخليقة سرير مال الطوارىء گاعد على بلوكات كونكريت جايبها أهل المريض من الشارع !!! لو أكو بكل الخليقة مدرسة يداومون بيها ثلاث مدارس مختلفة بأوقات مختلفة !! لو أكو بكل الخليقة وحتى بكوكب كيبلر دولة ما بيها عملات معدنية !!! من طاح حظنا إحنا إللي راضين بيكم وجبناكم وساكتين عليكم، مو هي مرحلة القنادر بعد مرحلة النعلان مال إبن العوجة.
لو…وأدري هو اللو للحسرة والضياع ومال ماكو چارة، بس لو …
ولو ما نريد نشتري بريطانيا، عوووووووووووع عووووووووع بريطانيا شنو، مو بس زرق ورق، لعبان نفس ومخازي وفشلة، أي لو ما نريد نشتري، چنا نوزع هذا التريليون العراقي إللي إنباگ من عدنا على كل شخص عراقي تدرون كل شخص إشگد چان يحصل : إقسم التريليون على 32 مليون عراقي وعندك الحساب، يعني كل فرد 31250 إسترليني، وكل عائلة عراقية مو أقل من ست نفرات يعني حصة كل عائلة هي 187500 جنيه إسترليني، ننطي 500 للمختار حتى ينطينا ورقة إحنا عراقيين، يعني بحدود ربع مليون دولار إذا نحسب الفرق بين الجنيه والدولار، چان كل عائلة عراقية تخلي 100 ألف دولار إستثمار ببنك أي دولة أوروپية وتحصل على إقامة وجواز ذيچ الدولة، لا عمايم ولا إنتخابات ولا شكولات زفرة مثل هاي
إللي هي مدير مؤسسة وعيب تكتب إسمها بالقطعة إللي على مكتبها، شلون واحد يعرف إسمها وهي علوية زينبية طاهرة مطهرة حتى ما تجيها الدورة ولا تحيض لأن علوية !! أم محمد تقي، من نعلة على التقوى والسجود والقيام إذا يخليچ بهاي العقلية المقبغة، طبعاً قبغ على قبغ، كلكم قبغيون وخيركم من أزاح القبغ عن رأسه، من هذا يوم إللي إجاكم واحد وشال القبغ صار عجبه، وصار بيت آل كاشف القبغ !
يابة
مثل ما هسة أكو حملة ألف الخيرية مال أخونا علي أكاكي أكاكيفيتش، همين نحتاج هيچ حملة ألف لشراء بريطانيا، خلونا نبدي نجمع ألافاتنا من هسة، وما نعتمد عالحكومة، ونجمع ألف على ألف، ومليون على مليون، ومليار على مليار ونشتري بريطاينا ونخلص، همين نساعد بريطانيا ونطلعها من حال الكساد الإقتصادي ونرد لهم فضل الأيام الحلوة إللي عشناها تحت إحتلالهم، وهمين نخلص من هذي البلاد الظالم حكامها وإنتخاباتها ودستورها وقوانينها، لو نكتب رسالة لأخينا علي أكاكي بلكن يشملنا بالحملة، ونلم چم ألف، لأن نريد نشتري بريطانيا قبل ما غيرنا يدخل المزاد ويخربط علينا الفلم، خاصة أكو ناس هواية يعرفون شلون يستثمرون فلوسهم، مو مثلنا، إستثمرنا بحركات تحرر وهمية وفلوسنا كلها راحت بجيب سامورا ميشيل وأورتيغا وولد طارق عزيز لأن هو الرفيق طارق چان مدير مكتب حركات التحرر في القيادة القومية.
ونروح ببريطانيا، ونغرس رايتنا هناك، وبنص ميدان الطرف الأغر، نغني :
يا گاع ترابچ كافوري …
والعاقبة للفلوس.