خلونا نشوف منو وشنو وشلون وليش البلد طاح حظه بعد ٢٠٠٣ حتى تعرفون شنو الجاي.
أنتو إللي فرحانين بفوز الكتلة الصدعية ( الصدر + الشيوعي ) عساس الدولة المدنية جاية، راح أكشف حساب وياكم وأريدكم تغلطوني إذا الحچي مو تمام… هل أنتم موافقون ؟ لعد إستلم :
منو بدا بالحواسم يوم ٩ نيسان ٢٠٠٣؟ مو كلهم جوي من مناطق الثورة إللي هي نفسها الصدر حالياً؟ مو هم أول من دخلوا اللجنة الأولمبية ووزارة الداخلية ودائرة الجوازات وباگوا وحرگوا، وهم كانو بداية لطبقة الحواسم إللي گلبت البلد على بطانتها العفنة والخايسة؟ هذا الحچي مو طائفي وتدرون بي آني والدين والطائفة لا أرى القرد ولا القرد يراني، هاي الشغلات ما تسوى عندي نعل معاد، بس هاي حقيقة مسجلة عاليوتيوب ومحد يگدر ينكرها.
وبعدين تعال، منو لبّس البلد عمامة ونزع عنه اللبس الأفندي؟ مو شوفوا فيديوات الفيشة عاليوتيوب حتى تعرفون إللي طيح حظ البلد، مو هو نفسه إللي أول من أسس جماعة مسلحة طائفية بالعراق؟ ها نسيتوا بسرعة أصحاب ذاكرة السمچة؟ نسيتوا جيش إللي قائدة غايب بعذر غير مشروع ؟ نسيتوا الجيش إللي كلهم نفسهم أهل الحواسم كل واحد شاد له رتبة هريسة ركن لو فريق أول زردة وگام يقتل ويذبح بفتوى من الفقمة ؟ أدري بهاي السرعة تفرمتون الذاكرة ؟
نسيتوا منو بدا الذبح الطائفي وي المگبور عدنان كلب الدشبول وطارق الهراتي الهامشي؟ مو هو نفسه قائد جيش الإمام الغائب؟ مو هو حبيبي جيبه جيبه نعدل الأريل والفيشة وإذا ما تتحمل آني أتحمل ؟
وهمين ميخالف، منو كان يدعم أكثر الوزراء الفاسدين في تاريخ العراق؟ مو كلهم جوي من التيار المموي؟ نسيتوا سلام وزير التيار وشگد باگ وسرق من چان وزير النقل، وينه هو؟ نسيتوا بسرعة بهاء الإيرلندي من بائع بطاقات موبايل إلى ملياردير بالدولارات ويلعب لعب، وينه؟ نسيتوا وزير الإعمار المهتلف إللي صار صاحب أكبر شركة عقارية ومقاولات مو بس بالعراق لا يابة العراق محد يگلبه ! روح وشوف وين ما وين وشلون.
وبعدين تعال شوف صورة حبيبي مع كتكوت الحكمة بعد إجتماع الليلة، وراح تعرف شلون دولة علمانية ومدنية بالطريق ؟ على اليمين عمامة سودة وعلى اليسار عمامة سودة وبوجههكم أيام سودة بسواد الخدعة إللي مخدوعين بيها، يعني بكل عقلكم هذول راح يعوفوكم تفصلون وتخيطون مثل ما تريدون وترجعون أفندية؟ صدگ تحچون؟ هالگد غشمة ؟
وعوفكم من هذا وتعال ونشوف رفاق ماركس، بشرفكم بكل الدنيا سامعين وشايفين حزب ماركسي يتحالف وي صاحب عمامة يستحرم الطوبة والطاولي والشطرنج؟ هذول ناس إنتهازيين من البداية بدوها سرقة، سرقة غير شكل، سرقوا صوت إحتجاج الناس المستقلين بساحة التحرير وجيروه لصالحهم عساس هم إللي حركوا الشارع، يعني الرفاق من البداية متحزمين سرقة ومحترفين بيها، طبعاً هم من اليوم إللي صفگوا لسرقة مستقبل العراق وفرحته قبل ستين سنة وهم همّ أصحاب اليد الخفية بكل سرقة. شوفوا وين صاروا قادة رفاق ماركس إللي چانوا ضد الرأسمالية؟ كلهم بلندن وپاريس وأميركا وألمانيا وكندا وأستراليا، وهاي الدول شنو ؟رأسمالية لو رأس بصلية ؟
يعني البلد جاي على مرحلة صدعية، صداع بالراس ، وصدع بالمجتمع وإنكسار وتكسر وتصدع كل القيم، وما راح نعرف مو بس نفتح حلگنا، لا ما راح نعرف نفتح عيوننا، لأن كل شي أسود سواد العمامة وكل شي سرقة.
